Aqmola oblysynda «Naýryz qupııalary» ınteraktıvti kvesti iske qosyldy
KÓKShETAÝ. KAZINFORM - Kóktemgi kún men tún teńeletin mereke qarsańynda óńir biregeı mádenı oqıǵanyń ortalyǵyna aınaldy. Munda ǵasyrlar boıy qalyptasqan mura zamanaýı tehnologııalarmen ushtasyp otyr. «Naýryz qupııalary» mýzeılik QR-kvesti óz jumysyn bastap, óńir turǵyndary men qonaqtaryna Naýryz meıramyn qazirgi ınteraktıvti formattar arqyly jańasha tanyp-bilýge múmkindik usynyp otyr.
Qazaqstan Prezıdenttik ortalyǵynyń qoldaýymen júzege asqan joba tarıhty tanýdy qyzyqty saıahatqa aınaldyrýdy maqsat etedi. Uıymdastyrýshylar tsıfrlyq quraldardy dástúrli mýzeı keńistigine sheber engizip, mádenı murany smartfonmen ósken jas býynǵa barynsha jaqyn ári túsinikti etýdiń kreatıvti jolyn tapqan.
Kvesttiń negizgi tanym quraly – mýzeı zaldaryna arnaıy ornalastyrylǵan QR-kodtar. Olardy skanerleý arqyly qatysýshylar qazaqtyń baı dástúrler álemine birden enip, «Kórisý» saltynyń máninen bastap, merekelik basty taǵam – Naýryz kójeniń tereń maǵynasyna deıingi aqparatpen tanysa alady. Interaktıvti beınerolıkter, arhıvtik derekter men qyzyqty tapsyrmalar kelýshilerge eksponattardy jaı ǵana tamashalaýǵa emes, Ulystyń uly kúni – Naýryzdyń erekshe atmosferasyn tereń sezinýge múmkindik beredi.
– Bizdiń maqsatymyz – árbir kelýshi ózin zertteýshi retinde sezinetin tiri ári serpindi mádenı keńistik qalyptastyrý. QR-tehnologııalar tarıhqa degen qurmetti jastardyń qyzyǵýshylyǵymen úılestirýge múmkindik beredi. Bul – halyqtyq qundylyqtardyń saqtalyp qana qoımaı, jańa býynǵa túsinikti ári jaqyn bolýyna qosqan úlesimiz, – dep atap ótti joba uıymdastyrýshylarynyń biri.
«Naýryz qupııalary» óńirdegi aýqymdy merekelik baǵdarlamanyń bir bóligine aınaldy. Baǵdarlama aıasynda qolóner sheberleriniń festıvalderi men taqyryptyq kórmeler de uıymdastyrylyp jatyr. Mundaı keshendi tásil qazaq mádenıetiniń baılyǵyn jan-jaqty tanystyryp, ár jastaǵy aýdıtorııany merekelik is-sharalarǵa tartýǵa múmkindik beredi.
Kvesttiń alǵashqy qatysýshylary jańa formatty joǵary baǵalap úlgerdi. Olardyń aıtýynsha, «tsıfrlyq qupııalardy» izdeý mýzeıge qarapaıym saıahatty naǵyz detektıvtik zertteýge aınaldyrady.
– Bul – keremet tájirıbe! Men ulttyq dástúrlerimizdiń kóptegen qyryn óte jeńil ári qyzyqty formatta bildim. Ózińdi ótkenniń qupııalaryn ashyp júrgen naǵyz zertteýshi sııaqty sezinesiń. Dástúrlerimizdiń osyndaı zamanaýı formatta usynylǵany óte qýantady, – deıdi kvest qatysýshysy Aınur.
Osylaısha Aqmola oblysy ata-baba murasyn qurmetpen saqtaı otyryp, ony qazirgi zaman talaptarymen ushtastyra biletin óńir ekenin taǵy bir márte dáleldedi. Munda dástúrler ótkenniń enshisinde qalyp qoımaı, jańa maǵyna men tsıfrlyq tynys alyp, damyp keledi.
