Aqmola oblysynda naýqastyń 1,5 mln teńgesin aldap alǵan dáriger sottaldy

KÓKShETAÝ. KAZINFORM — Atbasar aýdandyq soty naýqastyń týysyn 1,5 mln teńgege aldap soqqan dárigerge qatysty qylmystyq isti qarady. Bul týraly Aqmola oblystyq sotynyń baspasóz qyzmeti habarlady.

Іs materıaldaryna sáıkes, 2025 jylǵy shildede Atbasar kópsalaly aýdanaralyq aýrýhanasynyń terapııalyq bólimin ýaqytsha basqarǵan dáriger R. aýyr halde túsken naýqasqa Astanadaǵy №2 qalalyq aýrýhanada «aqyly em alý qajet» degen usynys jasaǵan.

Dáriger naýqastyń tegin medıtsınalyq kómek alý quqyǵy baryn bilgenine qaramastan, kardıohırýrgpen eshqandaı kelisimsiz týysyn aldap, 1,5 mln teńge talap etken. Naýqastyń týysy bir kúnde 500 myń teńgeni, kelesi kúni qalǵan 1 mln teńgeni dárigerdiń esepshotyna aýdarǵan.

Sottyń málimetinshe, aıyptalýshynyń kinási moıyndaýymen, jábirlenýshiniń aıǵaqtarymen, saraptama qorytyndylarymen jáne alynǵan dáleldemelermen rastaldy.

Sot dárigerdiń shyn júrekten ókinýin jeńildetetin jaǵdaı retinde eskerip, oǵan eki jyl merzimge bas bostandyǵyn shekteý jazasyn taǵaıyndady. Sonymen qatar, úsh jyl boıy medıtsınalyq qyzmetpen aınalysý quqyǵynan aıyryldy.

Úkim zańdy kúshine engen joq.

Aıta keteıik, Aqmola oblysynda 3,7 mlrd teńge jymqyrǵan alaıaqtar tobynyń isi sotqa joldandy.