Aqmola oblysynda naýqastar jóndeý jumystary aıaqtalmaǵan aýrýhanalarda em alýǵa májbúr
ASTANA. KAZINFORM – Aqmola oblysyndaǵy birqatar aýrýhanada kúrdeli jóndeý jumystary aıaqtalmaı tur. Soǵan qaramastan medıtsınalyq mekemeler naýqastardy qabyldaýdy toqtatpaǵan, al turǵyndar emdi jóndeý júrip jatqan ǵımarattarda alýǵa májbúr.
Aqkól aýdandyq aýrýhanasynda em alyp jatqan azamattar áleýmettik jelilerde óz jaǵdaılaryn aıtyp shaǵym bildirdi. Olardyń sózinshe, aýrýhanadaǵy jıhaz ben tósek-oryn ábden tozǵan, palatalarda jylý jetkiliksiz. Sol sebepti adamdar qosymsha jylytqysh paıdalanýǵa májbúr.
Atalǵan jaǵdaıǵa qatysty Aqmola oblystyq densaýlyq saqtaý basqarmasynyń basshysy Narıman Ermek pikir bildirdi.
– Qazir oblystaǵy densaýlyq saqtaý salasynyń aldynda turǵan basty másele – aýrýhanalardy jóndeý men jańǵyrtýdy tolyq aıaqtaý. Jańǵyrtý jobalaryna kelsek, jalpy 38 nysannyń 95 paıyzy paıdalanýǵa berilip, jumysyn bastap ketti. Al kúrdeli jóndeýge baılanysty túıtkildiń basty sebebi – qarjynyń tapshylyǵy. Bul jaǵdaı keıde josparlaý nemese quqyqtyq rásimderdegi qıyndyqtarmen de baılanysty bolýy múmkin. Qalaı bolǵanda da, Shortandy, Arshaly, Aqkól sııaqty aýdandardaǵy aýrýhanalardaǵy jóndeý jumystary tek qarjylandyrýdyń bolmaýyna baılanysty toqtap tur, – dedi basqarma basshysy.
Narıman Ermektiń aıtýynsha, óńir medıtsınasy respýblıkalyq jáne jergilikti bıýdjetten, sondaı-aq arnaıy memlekettik qordan qarjy bólinýin kútip otyr. Al ázirge ulttyq baǵdarlamalarǵa engen medıtsınalyq mekemelerge basymdyq berilip, jóndeý sol nysandarda jalǵasyp jatyr.
– Stepnogorsk qalalyq aýrýhanasynda kúrdeli jóndeý kezinde operatsııalyq jáne reanımatsııalyq bólimsheler boıynsha máseleler týyndap, qazir sot protsesi júrip jatyr. Qalǵan bólimderde jumystardy jańa merdiger qolǵa aldy, bul baǵytta arnaıy memlekettik qordan qarjylaı qoldaý kórsetilip otyr. Sot sheshimine qaramastan, Stepnogorsk aýrýhanasyndaǵy barlyq josparlanǵan jumystar tolyq aıaqtalady, – dedi ol.
Onyń aıtýynsha Shortandy, Arshaly jáne Aqkól aýdandaryndaǵy aýrýhanalardyń kúrdeli jóndeýin aıaqtaýǵa qarjy qashan bólinetini jóninde naqty merzim aıtý ázirge múmkin bolmaı otyr.
– Búginde óńirdiń qarjylyq múmkindigi shekteýli. Sondyqtan jóndeý jumystary jaqyn arada bastalady dep naqty aıtý qıyn. Sol sebepti aýrýhanalar jóndeý jaǵdaıynda qyzmet kórsetýge májbúr bolyp otyr. Degenmen sanıtarııalyq-epıdemıologııalyq qyzmet pen baqylaýshy organdar sanıtarlyq talaptardyń saqtalýyn qadaǵalaıdy. Qujattary talapqa saı kelmegen nysandarǵa aıyppul salynyp, qajet jaǵdaıda ýaqytsha jabý týraly sheshimder qabyldanady. Qyzmet tek ǵımarat tolyq talapqa saı keltirilgennen keıin ǵana qaıta jandanady. Sanıtarlyq qyzmet tarapy túsinistikpen qarap otyr. Bul máselelerdi qoldan kelgenshe sheshýge tyrysyp jatyrmyz, – dep túıindedi basqarma basshysy.
Aıta keteıik, buǵan deıin Soltústik Qazaqstan oblysyndaǵy aýrýhanany jóndeýge 1,3 mlrd teńge bólingeni habarlanǵan bolatyn.