Aqmola oblysynda muz jarý jumystary bastaldy
KÓKShETAÝ. KAZINFORM - Aqmola oblysynda kóktemgi sý tasqynynyń yqtımal qaýp-qaterin aldyn alý jumystary aıasynda ózenderde muz jarý jumystary bastaldy.
«Qazgıdromet» respýblıkalyq kásiporny oblystyq fılıalynyń málimetinshe, aǵymdaǵy jyldyń aqpan aıynda óńirde jaýyn – shashyn mólsheri ótken jyldyń kóleminen 2 ese jáne ortasha aılyq normadan 1,5 ese artyq túsken.
Arshaly, Atbasar, Sandyqtaý, Astrahan, Tselınograd aýdandarynda qardyń deńgeıi joǵary ekeni baıqalady. Sonymen birge, ótken jyldyń kúzinde Esil, Sileti, Shaǵalaly, Jabaı jáne Qalqutan ózenderiniń basseınderindegi topyraqtyń ylǵaldylyǵy kópjylǵy ortasha kórsetkishten joǵary boldy. Esil, Shaǵalaly, Qalqutan, Jabaı ózderinde sýdyń deńgeıi jyldaǵy normadan birshama asatyny boljanýda.
Oblys aýmaǵynda jaǵdaıǵa monıtorıng jasaıtyn jáne boljaıtyn 15 meteopost, 34 gıdropost jáne 15 agrometeopost bar. Qar sýy erigen kezde ózenderdegi jaǵdaıǵa monıtorıng jasaý úshin 82 ýaqytsha baqylaý beketteri táýlik boıy kezekshilik atqarady.
Aqmola oblysy boıynsha TJD málimetinshe, aımaqta sý tasqynyna daıyndyq ótken jyldyń jaz mezgilinde bastaldy. Eldi mekenderdi ınjenerlik qorǵaý jónindegi josparǵa sáıkes, qaýpti aımaqtardaǵy eldi mekenderde sý burý arnalaryn jaılastyrý, keńeıtý jáne tereńdetý, ózen arnalaryn tazartý, sý burý arnalaryn tazartý, qolda bar topyraq úıip bekitilgen jerlerdi nyǵaıtý jáne ulǵaıtý, bógetterdi jóndeý, topyraq úıip bekitilgen jerlerdi turǵyzý, sý ótkizý qurylystaryn jaılastyrý boıynsha jumystar júrgizildi. Aqpan aıynyń sońyndaǵy málimet boıynsha eldi mekenderden 600 myń tekshe metrge jýyq qar shyǵaryldy.
«Aqmola oblysynda kóktemgi sý tasqynynyń yqtımal qaýp-qaterin aldyn alý jumystary aıasynda ózenderde muz jarý jumystary bastaldy. Stepnogorsk qalasynyń mańyndaǵy Sileti ózeninde barlyǵy 700 sharshy metr aýmaqta muz jarý úshin 25 kg jarylǵysh zat qoldanyldy», - dedi TJD bastyǵy Qanat Dospaev.
Aıtýynsha, oblystyq bıýdjetten 2024 jylǵa yqtımal tótenshe jaǵdaılardy aldyn alýǵa jáne joıýǵa, jergilikti atqarýshy organdardyń shuǵyl shyǵyndaryna, sondaı-aq, tabıǵı jáne tehnogendik apattardy joıý úshin qajetti barlyǵy 2 mlrd 239 mln teńge qarjy rezervi bekitildi. Al oblystyq bıýdjetten tótenshe jaǵdaılar departamentine kólikke, ǵaryshtyq monıtorıngke, jarylys jumystaryna 69,8 mln teńgeden astam qarajat bólindi», - dedi vedomstvonyń baspasóz qyzmetinen.
Búgingi kúnge deıin oblys boıynsha tótenshe jaǵdaıdyń aldyn alý úshin 226 tonna janar-jaǵarmaı, 21,9 myń tonna ınertti materıaldar, 86,7 myń qap qory jasaldy. Sý tasqyny qaýpiniń aldyn alýǵa TJD jeke quramynan 398 adam, 73 birlik tehnıka, 82 motopompa, 10 júzý quraldary jumyldyrylmaqshy. Jalpy, barlyq menshik nysanynda 2430 adam jáne 1078 tehnıka qarastyrylǵan.