Aqmola oblysynda múgedektigi bar adamdardy jumyspen qamtý kvotasy ulǵaıdy – prokýratýra
ASTANA. KAZINFORM – Múgedektigi bar azamattardy jumyspen qamtýǵa qatysty máselege oblys prokýratýrasy 2024–2025 jyldar aralyǵynda múgedektigi bar adamdardyń quqyqtaryn qorǵaý salasyndaǵy zańnamanyń saqtalýyna taldaý barysynda kóz jetkizgen.
Oblystyq prokýratýranyń bapasóz qyzmetiniń habarlaýynsha, taldaý nátıjesinde olardyń jumyspen qamtý sharalaryn iske asyrý barysynda eleýli zańbuzýshylyqtarǵa jol bergeni anyqtaldy.
Zańnamaǵa sáıkes múgedektigi bar adamdardyń eńbekke ornalasý quqyǵy jergilikti atqarýshy organdarmen eńbek naryǵynyń qajettilikteri men eńbekke qabiletti múgedektigi bar adamdardyń sanyna taldaý jasaý negizinde belgilenetin jumys oryndary kvotasy sheńberinde qamtamasyz etilýge tıis.
Sonymen qatar, Aqmola oblysy boıynsha jalpy alǵanda, eńbekke qabiletti múgedektigi bar adamdardyń edáýir sanynyń bolýyna jáne kadr tapshylyǵynyń saqtalýyna qaramastan, jergilikti atqarýshy organdarmen buryn bar-joǵy 34 kvotalyq jumys orny ǵana kózdelgeni anyqtaldy.
Bul zańnama talaptaryna jáne eńbek naryǵyndaǵy naqty jaǵdaıǵa sáıkes kelmeıdi.
- Jumys oryndary kvotasyn belgileý jáne iske asyrý boıynsha júıeli ári negizdelgen jumystyń bolmaýy múgedektigi bar adamdardyń zańdy quqyqtarynyń buzylýyna, sondaı-aq teń múmkindikterdi qamtamasyz etýge jáne áleýmettik osal sanattaǵy azamattardy eńbek naryǵyna yqpaldastyrýǵa baǵyttalǵan memlekettik áleýmettik saıasattyń negizgi basymdyqtaryna nuqsan keltirdi, - delingen habarlamada.
Osy rette prokýrorlyq qadaǵalaý aktisi boıynsha múgedektigi bar adamdardy jumyspen qamtýǵa arnalǵan jumys oryndary kvotasy 2026 jylǵa 117-ge deıin ulǵaıtyldy.
Oblys prokýratýrasy osy baǵyttaǵy jumysty jalǵastyra bermek.
Osyǵan deıin Qazaqstanda 27 myńnan asa nysan múgedektigi bar adamdar úshin beıimdelgeni týraly jazdyq.