Aqmola oblysynda montajdaý jumystary kezinde bolǵan apattan eki adam qaza tapty

ASTANA.KAZINFORM - 6 shilde kúni Tselınograd aýdany, Qaraótkel aýylyndaǵy sý qubyry jelisin montajdaý jumystary kezinde qudyqta apat bold. Saldarynan eki jumysshy qaza taýyp, ekeýi aýrýhanaǵa jetkizildi, dep habarlaıdy oblystyq polıtsııa departamenti.

Atalǵan fakt boıynsha QR Qylmystyq kodeksiniń 156-babynyń 4-bóligi «Eńbekti qorǵaý qaǵıdalaryn buzý» boıynsha sotqa deıingi tergeý bastaldy. Tıisti sot-medıtsınalyq saraptamalar taǵaıyndalyp, memlekettik eńbek ınspektory tekserý júrgizip jatyr.

Polıtsııa departamenti jumys berýshilerdi qyzmetkerlerdi qaýipsizdik tehnıkasy boıynsha turaqty oqytý uıymdastyrý, jeke qorǵaný quraldaryn paıdalanýdy qadaǵalaý, jumys protsesterin uıymdastyrýdaǵy kez kelgen buzýshylyqtardy jedel joıýǵa shaqyrady.

Osyǵan deıin Aqtóbede lokomotıv deposynyń aýmaǵyndaǵy oqıǵadan soń eki jumysshy mert bolǵany týraly jazdyq.