Aqmola oblysynda Mercedes júrgizýshisi tórt jaıaý júrginshini qaǵyp ketti

KÓKShETAÝ. KAZINFORM – Aqmola oblysynyń Atbasar qalasynda Mercedes markaly kólik tórt jaıaý júrginshini qaǵyp ketti. Olardyń qatarynda eki bala bar. Barlyǵy túrli dene jaraqatymen aýrýhanaǵa jetkizildi.

Jol-kólik oqıǵasy 12 sáýir kúni bolǵan. Oqıǵanyń beınejazbasy áleýmettik jelilerde tarap ketti.

Oblystyq polıtsııa departamentiniń málimetinshe, qazirgi tańda sotqa deıingi tergeý júrgizilip jatyr. Qorytyndysy boıynsha protsessýaldyq sheshim qabyldanady.

— Jol apatynan keıin tórt adam medıtsınalyq mekemege jatqyzyldy. Oqıǵa boıynsha tergeý bastaldy, — dep málimdedi polıtsııa ókilderi.

Quqyq qorǵaý organdary jol-kólik oqıǵalarynyń aldyn alý úshin júrgizýshilerge jyldamdyq rejımin saqtap, kólik quraldarynyń tehnıkalyq jaǵdaıyna kóńil bólý qajet ekenin eske saldy.

Aıta keteıik, buǵan deıin Atyraý oblysynda jol apatynan 3 adam mert bolǵany habarlanǵan edi.