Aqmola oblysynda memleketke quny 500 mln teńgeden astam jer telimi qaıtaryldy

ASTANA. KAZINFORM –  Aqmola oblysynda prokýratýra quqyqtyq aktilerdi baǵalaý barysynda jer zańnamasynyń buzylýyn anyqtady. Bul týraly Aqmola oblysynyń prokýratýrasynyń baspasóz qyzmeti habarlady.

— Jer resýrstaryn basqarý bólimi kommertsııalyq orman ósirý úshin jeke tulǵaǵa 36 gektar jer telimin zańsyz bergen, atalǵan jer telimi halyqtyń demalysy men saýyqtyrýyna arnalǵan rekreatsııalyq aımaqqa tıesili bolǵan, — delingen habarlamada.

Qadaǵalaý aktisi boıynsha jer resýrstaryn basqarý departamenti sotqa júgindi.

— Mamandandyrylǵan aýdanaralyq ekonomıkalyq sottyń sheshimi boıynsha jasalǵan kelisim jaramsyz dep tanylyp, kadastrlyq quny 567 mln teńge turatyn jer telimi rekreatsııalyq maqsattaǵy jerler quramyna qaıtaryldy. Qabyldanǵan qadaǵalaý sharalary nátıjesinde Şýchınsk qalasynda rekreatsııalyq aımaqqa tıesili jerlerdiń quqyqtyq rejımi qalpyna keltirildi, — delingen prokýratýra habarlamasynda.

Jer teliminiń rekreatsııalyq qorǵa qaıtarylýy aýmaqtyń ekologııalyq teńgerimin saqtaýǵa jáne onyń maqsatsyz paıdalanylýyna jol bermeýge múmkindik berdi. 

Aıta ketelik Qaraǵandyda quny 5 mlrd teńgege jýyq jer telimi memleket menshigine qaıtaryldy.