Aqmola oblysynda 690 pedagog jetispeıdi
KÓKShETAÝ. KAZINFORM - Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Kókshetaý qalasynda Aqmola oblysynyń áleýmettik salasyna qatysty máseleler qaraldy. Keńes «Aqmola Digital» alańynda ótip, oǵan oblys ákimi Marat Ahmetjanov, áleýmettik sala vıtse-mınıstrleri, ortalyq memlekettik organdar men óńirdegi áleýmettik sala basshylary qatysty. Bul týraly Úkimettiń baspasóz qyzmeti habarlady.
Eń aldymen, qatysýshylar oblystaǵy bilim berý salasyn, ásirese mektepke deıingi bilim berý máselelerin talqylady. Balabaqshalar 97,1% balany qamtyǵanymen, áli 3 myńnan astamy kezekte tur, bul ınfraqurylymǵa túsken júktemeniń kóp ekenin kórsetedi. Sonymen qatar mamandar boljamy boıynsha 2028 jylǵa qaraı mekteptegi oryndar tapshylyǵy 4 myńǵa deıin jetýi múmkin. Buǵan qosa, óńirdegi bilim sapasyna kadr jetispeýshiligi de keri áserin tıgizip otyr. Mektepke deıingi bilim berý salasynda 690 pedagog jetispeıdi, al jekemenshik sektorda biliktilik sanaty bar pedagogterdiń úlesi nebári – 13,4%.
Óńirdiń densaýlyq saqtaý júıesindegi keı kórsetkishterdiń jaqsarýy negizgi máselelerdi tolyq sheshpeıdi. Densaýlyq saqtaý mınıstrliginiń málimetinshe, oblys boıynsha ómir súrý uzaqtyǵy – 74,2 jas. Sonymen qatar 2025 jyldyń 10 aıynda jalpy ólim-jitim 4%, náreste ólimi 36,7 % jáne týberkýlezden kóz jumǵandar sany 29,6% tómendegen. Analar ólimi kórsetkishi de jeke qarastyryldy. Boljam boıynsha 11,8% bolǵanymen, naqty kórsetkish 100 myń adamǵa shaqqanda 49,6 % bolǵan.
- Adamdar úshin eseptegi sandar emes, naqty nátıje mańyzdy. Kórsetiletin kómek qoljetimdi, ýaqytyly jáne sapaly bolýy kerek. Árbir salynǵan nysan lıtsenzııa, qural-jabdyqtar, kadrlarmen qamtamasyz etilip, «tolyq tsıklde» jumys isteýi tıis. Al ana ólimi men júrek-qan tamyrlary aýrýlary sııaqty «asa sezimtal» kórsetkishter boıynsha jekelegen sharalar emes, biryńǵaı basqarýshylyq baılanys pen barlyq deńgeıde jaýapkershilik qajet, - dedi Aıda Balaeva.
Áleýmettik qorǵaý jáne jumyspen qamtý salasynda ataýly áleýmettik kómektiń tıimdiligine tikeleı yqpal etetin derekterdiń sapasy negizgi másele retinde atap ótildi. Biryńǵaı tsıfrlyq platformaǵa 727 uıym engizilgeni sóz bolyp, sonymen qatar qosarlanǵan jumyspen qamtý men kadrlyq eseptiliktegi burmalaýlardy qosa alǵanda, qaıta tekserýdi qajet etetin jaǵdaılar anyqtalǵany aıtyldy.
Kadr máselesi de jıynda talqylanǵan mańyzdy taqyryptyń biri boldy. Oblysta Ǵylym jáne joǵary bilim mınıstrligine qarasty 3 joǵary oqý orny jumys isteıdi (13,1 myń stýdent, onyń ishinde 4,7 myńy – memlekettik tapsyrys boıynsha). Al óńir ekonomıkasynyń jyl saıynǵy kadr qajettiligi shamamen 12,5 myń adam, onyń jartysynan astamy tehnıkalyq jáne kásiptik bilim berý salasyna tıesili. Osyǵan baılanysty óńirlik bilim berý tapsyrysyn naqtylaý jáne erte kásibı baǵdar berý jumysyn kúsheıtý qajettigi kóterildi.
Sonymen qatar Aıda Balaeva jumys sapary aıasynda Aqmola oblysynyń Qoǵamdyq keńes múshelerimen kezdesý ótkizdi. Kezdesýde halyqpen turaqty baılanys ornatý jáne áleýmettik qyzmetterdiń sapasyna qoǵamdyq baqylaýdy kúsheıtý máseleleri jan-jaqty talqylandy.
Keńes qorytyndysy boıynsha Aıda Balaeva birqatar tapsyrma berdi. Atap aıtsaq, bilim berý salasy boıynsha jeke jospar ázirleý, densaýlyq saqtaý salasyndaǵy baqylaýdy ana ólimine, kadr máselesine jáne alǵashqy medıtsınalyq-sanıtarlyq kómekti «tolyq tsıklde» iske qosýǵa basymdyq bere otyryp kúsheıtý, áleýmettik saladaǵy derekterdi verıfıkatsııalaýdy aıaqtaý jáne qosarlanǵan qarjylandyrýdyń aldyn alý.
Sondaı-aq kadrlardy óńir qajettilikterine saı daıarlaý, bilim jáne ǵylym, týrızm jáne sport salalary boıynsha ınfraqurylymdyq sheshimderdi naqty merzimi men jaýaptylardy aıqyndaı otyryp, jedeldetý tapsyryldy.
Aıta keteıik, Aqmola oblysynda 82 mln teńgege baǵalanǵan jer memleketke qaıtaryldy.