Aqmola oblysynda mekeme 107 jumyskerge 2,1 mln teńge ústemaqysyn tólemeı kelgen
ASTANA. KAZINFORM- Aqmola oblysy Tselınograd aýdanynyń prokýratýrasy anyqtaǵan zańbuzýshylyqtan keıin «Tselınograd Sý Arnasy» memlekettik kommýnaldyq kásipornynyń 107 jumyskerine 2,1 mln teńge ústemaqy tólendi, dep habarlaıdy Aqmola oblysy prokýratýrasynyń baspasóz qyzmeti.
Aýdan prokýratýrasy «Tselınograd Sý Arnasy» ShJQ MKK qyzmetinde eńbek zańnamasynyń saqtalýyna taldaý júrgizgen. Nátıjesinde zııandy jáne (nemese) qaýipti eńbek jaǵdaılarynda jumys isteıtin 107 jumyskerge zańnamada kózdelgen jalaqy ústemeaqylary tólenbegeni anyqtaldy.
Prokýratýranyń usynýyn qaraý nátıjesinde jumyskerlerge tıisti ústemeaqylar belgilenip, 2,1 mln teńge tólendi. Osylaısha, 107 jumyskerdiń konstıtýtsııalyq quqyqtary qorǵaldy.
-Azamattardyń eńbek jáne áleýmettik quqyqtaryn qorǵaý prokýratýra organdarynyń qadaǵalaý qyzmetiniń basym baǵyttarynyń biri bolyp tabylady,-delingen habarlamada.
Osyǵan deıin medıtsına qyzmetkerlerine ústemaqy tóleý barysynda birqatar zańsyzdyq áshkerlengeni týraly jazdyq.
