Aqmola oblysynda medıtsınalyq mekemeniń qyzmetkerlerge 35 mln teńgege jýyq qaryzy bar
ASTANA. KAZINFORM — Aqmola oblysynda «Avıtsenna-Býrabaı» JShS-niń medıtsına qyzmetkerleri jalaqynyń keshiktirilýine, eńbek demalysy jáne saýyqtyrý tólemderiniń berilmeýine, sondaı-aq zeınetaqy men medıtsınalyq saqtandyrý jarnalaryna qatysty máselelerge shaǵymdandy.
Oblystyq densaýlyq saqtaý basqarmasy kásiporynnyń qyzmetkerlerge bereshegi bar ekenin rastady. Sonymen qatar kompanııamen jasalǵan memlekettik-jekemenshik áriptestik (MJÁ) týraly shartty jedel tártippen buzý rásimi júrgizilip jatqanyn habarlady.
Áleýmettik jelilerde «Avıtsenna-Býrabaı» JShS-de jumys isteıtin medıtsına qyzmetkerleriniń úndeýi tarady. Olar jalaqynyń keshiktirilip tólenetinine, eńbek demalysy men saýyqtyrý tólemderiniń berilmegenine shaǵymdanǵan.
Qyzmetkerlerdiń aıtýynsha, kelisimshart boıynsha jalaqy ár aıdyń 10-yna deıin tólenýi tıis. Alaıda birneshe jyldan beri jalaqy keshigip beriledi. Máselen, tamyz aıynyń jalaqysyn jumysshylar tek 16 qyrkúıekte alǵan.
Budan bólek, medıtsına qyzmetkerleri shilde aıynan beri eńbek demalysyna shyǵýyna baılanysty tólenetin qarajat pen saýyqtyrý tólemderin ala almaı júrgenin aıtty. Sondaı-aq zeınetaqy jarnalary men mindetti áleýmettik medıtsınalyq saqtandyrý (MÁMS) júıesine aýdarymdar da ýaqytyly tólenbegen.
Qyzmetkerlerdiń sózinshe, MÁMS jarnalarynyń aýdarylmaýy medıtsınalyq kómek alýǵa da qıyndyq týǵyzyp otyr.
Jaǵdaıǵa Aqmola oblysynyń densaýlyq saqtaý basqarmasy túsinikteme berdi.
— Aqmola oblysynyń densaýlyq saqtaý basqarmasy «Avıtsenna-Býrabaı» JShS-men memlekettik-jekemenshik áriptestik týraly shartty buzý rásimin júrgizip jatyr. Jumys Qazaqstan Respýblıkasynyń zańnamasy men shart talaptaryna sáıkes atqarylyp jatyr. Qalyptasqan kúrdeli jaǵdaı jeke seriktestiń ózine alǵan mindettemelerin, onyń ishinde qyzmetkerler aldyndaǵy qarjylyq mindettemelerin tıisinshe oryndamaýyna baılanysty týyndady, — dep túsindirdi basqarma.
Basqarmanyń málimetinshe, 2026 jylǵy 1 qazandaǵy jaǵdaı boıynsha «Avıtsenna-Býrabaı» JShS-niń qyzmetkerlerge eńbek demalysyna baılanysty tólemder boıynsha bereshegi 34,6 mln teńgeni quraǵan.
— Basqarmanyń basty mindeti — Býrabaı aýdany turǵyndaryna medıtsınalyq kómektiń úzdiksiz kórsetilýin qamtamasyz etý jáne ótpeli kezeńde aýrýhananyń turaqty jumysyn saqtaý. Qyzmetkerler aldyndaǵy bereshekti óteý jáne uıym mindettemeleriniń oryndalýy baqylaýda. Oblys ákimdigimen birlesip, odan ári atqarylatyn is-qımyl jospary men algorıtm ázirlenip, oblys ákiminiń orynbasary deńgeıinde bekitildi. Qazirgi ýaqytta tıisti rásim, ıaǵnı MJÁ týraly shartty buzý qoldanystaǵy zańnama aıasynda jedel tártippen júrgizilip jatyr, — dep tolyqtyrdy basqarma.
Vedomstvo zańnama talaptaryna sáıkes «Avıtsenna-Býrabaı» JShS-ni memlekettik menshikke berý úshin qajetti quqyqtyq sharalar qabyldanyp jatqanyn atap ótti. Medıtsına qyzmetkerleriniń quqyqtary men zańdy múddeleri qoldanystaǵy zańnamaǵa sáıkes qamtamasyz etiledi.
Buǵan deıin Óskemende balalar stomatologııalyq emhanasy jumyskerleriniń eńbekaqysyn tólemegeni týraly jazdyq.
