Aqmola oblysynda maıly daqyldar egistigi 70%-ǵa ulǵaıyp, 840 myń ga jetti
AQMOLA OBLYSY. KAZINFORM – Aqmola oblysynda dala men egin jınaý jumystaryna 668 agrarshyǵa 93,8 mıllıard teńge jeńildikti qarjy berildi. Bul týraly óńirde ótken jıynda aıtyldy, dep habarlaıdy QR Aýyl sharýashylyǵy mınıstrliginiń baspasóz qyzmet.
Aýyl sharýashylyǵy vıtse-mınıstri Azat Sultanov Aqmola oblysyna jumys sapary aıasynda jergilikti turǵyndarmen jáne taýar óndirýshilermen kezdesti. Jıynda agroónerkásip keshenin damytý, memlekettik qoldaý jáne salany ilgeriletý máseleleri talqylandy.
Jeti aıdyń qorytyndysy boıynsha óńirde aýyl sharýashylyǵy óniminiń kólemi 5,3%-ǵa artty. Salanyń jalpy óńirlik ónimdegi úlesi 15%-dy qurady. Bıyl jalpy egis alqaby 5,6 mln gektarǵa jetti. Maıly daqyldar egiletin aýmaq 70%-ǵa ulǵaıyp, 840 myń gektardan asty.
Bólingen 93,8 mlrd teńge jeńildikti qarjylandyrý 1,2 mln gektar egistik alqapty qamtydy. Sonymen qatar jeńildikti lızıng baǵdarlamasy boıynsha 30,9 mlrd teńgege 475 birlik tehnıka jetkizýge 345 shart jasaldy.
Azat Sultanov óndiris kólemin ulǵaıtýdan tolyq qun tizbegin damytýǵa kóshý qajettigin málimdedi. Qazirgi ýaqytta mal sharýashylyǵyn damytýdyń Keshendi jospary bekitilip, «Igilik», «Bereke» jáne «Jaılaý» kredıttik ónimderi iske qosylǵan. Aınalym qarajatyn tolyqtyrýǵa 5%-dyq mólsherlememen kredıt berý baǵdarlamalary usynylýda.
Kezdesýde fermerler qaıta óńdeý óndirisin keńeıtý, ónimdi saqtaý men ótkizý ınfraqurylymyn damytý jóninde usynystar bildirdi. Sapar qorytyndysy boıynsha óńirdiń agroónerkásip keshenin damytýdyń basym baǵyttary aıqyndaldy.
Aıta keteıik, osyǵan deıin Aqmola oblysynda sý ınfraqurylymyn jańǵyrtýǵa qaıtarylǵan aktıvterden 1,4 mlrd teńge bólingen bolatyn.
