Aqmola oblysynda mamont qaldyqtary tabyldy

KÓKShETAÝ. KAZINFORM – Aqmola oblysynda, Novobratskoe aýyly mańynda júndi mamonttyń tómengi jaǵy men súıegi tabyldy, dep habarlaıdy Kazinform agenttigi Qazaqstan Respýblıkasynyń Ulttyq mýzeıine silteme jasap.  

Bastapqy taldaý nátıjesine sáıkes, tabylǵan qaldyqtar shamamen 40-50 jastaǵy eresek mamontqa tıesili, ol shamamen 40-15 myń jyl buryn ómir súrgen.

Bul taptyrmas oljany agroholdıng qyzmetkerleri Ádilet Omarov pen Áljan Raqyshev taýyp, birden QR Ulttyq mýzeıiniń mamandaryna habar bergen. Qazirgi tańda eksponat murajaıdyń ǵylymı zerthanasynda, arnaıy temperatýralyq jáne ylǵaldyq rejımde saqtalyp tur.

Ǵalymdardyń pikirinshe, osy mańnan mamonttyń tutas qańqasy tabylýy da múmkin.

«Kelesi maýsymda aýqymdy arheologııalyq qazba jumystaryn júrgizý josparlanyp otyr. Eger boljam rastalsa — bul Qazaqstan aýmaǵyndaǵy muz dáýiri faýnasyn zertteýdegi úlken jańalyq bolmaq», — delingen Ulttyq mýzeıdiń Facebook paraqshasynda jarııalanǵan habarlamasynda.

Aıta keteıik, buǵan deıin Qostanaı oblysynda da mamonttardyń, akýlalar men kóne kesirtkelerdiń qaldyqtary tabylǵany habarlanǵan.