Aqmola oblysynda malshylardyń eńbegin dáripteıtin jańa medıajoba iske qosyldy
ASTANA. KAZINFORM — Aqmola oblysynda mereıtoılyq X «Kazakhstan Jańa Dala / Green Day – 2026» mamandandyrylǵan kórme-demonstratsııasy qarsańynda «Eń halyqtyq malshy» medıajobasy iske qosyldy. Bul týraly AShM málim etti.
Joba Jumysshy mamandyqtar jyly aıasynda júzege asyrylyp, mal sharýashylyǵy salasy eńbekkerleriniń bedelin arttyrýǵa jáne olardyń qoǵamdaǵy mańyzdy rólin nasıhattaýǵa baǵyttalǵan.
— Medıajoba kúndelikti qajyrly eńbegi arqyly aýyl sharýashylyǵynyń damýyna jáne eldiń azyq-túlik qaýipsizdigin qamtamasyz etýge úles qosyp júrgen jandarǵa arnalǵan. Qoıshylar, sıyrshylar men jylqyshylar — agroónerkásip keshenindegi negizgi mamandyqtardyń ókilderi. Olar ulttyq mal sharýashylyǵynyń ǵasyrlar boıy qalyptasqan dástúrin jalǵastyryp, aýyldyq aýmaqtardyń turaqty damýyna eleýli úles qosyp keledi, — delingen habarlamada.
Búginde Qazaqstandaǵy iri qara mal basynyń 45 paıyzdan astamy jeke qosalqy sharýashylyqtarda ustalady.
Sondyqtan júzdegen myń aýyl turǵynynyń ál-aýqaty malshylardyń kásibıligi men adal eńbegine tikeleı baılanysty.
— Medıajoba aıasynda túsirilim toby Aqmola oblysynyń aýdandaryn aralap, mal sharýashylyǵy salasynda eńbek etip júrgen azamattarmen suhbattar túsirýde. Alǵashqy eki kúnde, ıaǵnı 25–26 maýsymda, túsirilim toby Atbasar, Bulandy, Býrabaı, Esil, Jaqsy jáne Zerendi aýdandarynda boldy, — dep habarlady vedomstvodan.
Joba keıipkerleri ózderiniń eńbek joly, otbasylyq dástúrleri, sharýashylyq júrgizýdiń erekshelikteri, urpaqtar sabaqtastyǵy jáne qazaq dalasyndaǵy aýyl ómiri týraly áńgimeleıdi. Barlyq beınematerıal ashyq jarııalanady, kórermender halyqtyq daýys berý arqyly «Eń halyqtyq malshy» nomınatsııasynyń jeńimpazyn anyqtaı alady.
Joba jeńimpazy 2026 jylǵy 16–17 shilde kúnderi Aqmola oblysy Tselınograd aýdanynyń Nuresil aýylyndaǵy «Aqtyq» agrofırmasy» aýmaǵynda ótetin mereıtoılyq X «Kazakhstan Jańa Dala / Green Day — 2026» kórme-demonstratsııasy aıasynda marapattalmaq.
