Aqmola oblysynda mal dárigerlerine sý jańa 19 avtokóliktiń kilti tabys etildi
KÓKShETAÝ. KAZINFORM – Aqmola oblysynyń ákimi Marat Ahmetjanov aýdandyq veterınarııa bólimderiniń basshylaryna sý jańa 19 qyzmettik avtokóliktiń kilti tabys etti.
Saltanatty sharada oblys basshysy veterınarııa salasynyń strategııalyq mańyzdylyǵyn atap ótti.
«Sizderdiń qyzmetterińiz et jáne sút ónimderiniń sapasyn baqylaýdy qamtamasyz etý, sondaı-aq janýarlar arasynda qaýipti aýrýlardyń taralýynyń aldyn alý arqyly halyqtyń densaýlyǵyna tikeleı áser etedi», - dedi Marat Ahmetjanov.
Ákimniń aıtýynsha, sońǵy jyldary veterınarlyq qyzmetterdiń materıaldyq-tehnıkalyq bazasyn jaqsartý jumystary birtindep sheshilip keledi.
Jańa kólikterden basqa, planshetter, modýldik veterınarııalyq pýnktter satyp alyndy jáne úlgilik mal qorymdarynyń qurylysy júrgizilip jatyr. Munyń bári veterınarlar jumysynyń tıimdiligin arttyrýǵa jáne halyqqa kórsetiletin qyzmetterdiń sapasyn jaqsartýǵa, epızootııalyq jáne epıdemıologııalyq jaǵdaıdy turaqtandyrýǵa, kadr máselesin sheshýge baǵyttalǵan.
«Aýdandardaǵy veterınarlyq stantsııalarǵa tehnıkalar 10 jyl buryn jańartylǵan bolatyn. Qazir olardyń kóbi eskirdi. Qystyń qary men jazdyń jańbyrly kúnderi eski kóliktermen shalǵaı aýyldarǵa qatynaý qıynǵa soǵady. Búgingi berilip otyrǵan jańa avtokólikter osy máseleni sheshýge septigin tıgizedi», - deıdi Ereımentaý aýdanynyń veterınarııalyq stantsııasynyń basshysy Oral Tóleýov.
Aıta keteıik, Aqmola oblysynda 19 memlekettik veterınarııalyq uıym, aýyldyq jerlerde 217 veterınarııalyq pýnkt jumys isteıdi.
Eske salaıyq, budan buryn Aqmola oblysynda 4 adamnyń brýtsellez juqtyrǵany anyqtalǵanyn jazǵan edik.
