Aqmola oblysynda mal azyǵyna arnalǵan proteın óndiretin zaýyt ashyldy
ASTANA. KAZINFORM — Jańa zaýyt aımaqtyń Aqkól qalasynda iske qosyldy, dep habarlaıdy QR Aýyl sharýashylyǵy mınıstrligi.
Investıtsııalyq joba agroónerkásiptik keshendi damytýǵa arnalǵan memlekettik saıasat aıasynda júzege asyrylyp, ımporttyq jemdik qospalarǵa táýeldilikti azaıtýǵa, mal sharýashylyǵy men balyq sharýashylyǵynyń ónimdiligin arttyrýǵa baǵyttalǵan.
Kásiporynnyń óndiristik qýaty aıyna — 150 tonna. Óndiriste negizinen iri qaranyń, jylqy jáne ózge de janýarlardyń terileri qaıta óńdelmek. Zaýytta shyǵarylǵan proteın qus, balyq, jylqy, qoı jáne iri qaraǵa qosymsha retinde paıdalanylady.
— Bul dástúrli jemniń tıimdiligin 40% arttyryp, óz kezeginde sharýashylyqtardyń ónimdiligin kóbeıtedi. Qazirdiń ózinde balyq ósirýshi kásiporyndarymen alǵashqy kelisimshart jasaldy. Sút jetkizý salasynda da alǵashqy qadamdar bar, — delingen habarlamada.
Aldaǵy ýaqytta óndiristi keńeıtip, ekinshi jelini iske qosý josparlanǵan. Bul quramajem men monokorm shyǵarýǵa múmkindik beredi.
Eske sala keteıik, elimizde 216,3 mlrd teńgege alkogolsiz sýsyndar shyǵaratyn zaýyt salynady.
