Kókshetaýda tanysynyń depozıtindegi aqshany ıemdengen kúdikti ony qumar oıynǵa jumsaǵan
ASTANA. KAZINFORM — Aqmola oblysynyń Kókshetaý qalasynda uıaly telefon men iri kólemdegi aqsha qarajatynyń joǵalýyna baılanysty sotqa deıingi tergeý bastaldy.
10 shilde kúni Kókshetaý qalalyq polıtsııa basqarmasyna jergilikti turǵyn aryzdanǵan. Onyń aıtýynsha, iPhone 15 uıaly telefony joǵalyp, keltirilgen jalpy shyǵyn kólemi shamamen 2,6 mln teńge bolǵan.
Tergeý barysynda polıtseıler joǵalǵan telefonda banktik qosymsha ornatylǵanyn anyqtady. Aldyn ala málimet boıynsha, jábirlenýshiniń depozıttik shotynda shamamen 2 mln teńge bolǵan.
— Oqıǵaǵa deıin 2007 jyly týǵan jas jigit tanysymen birge ýaqyt ótkizgen. Kelesi kúni tańerteń ol tanysyna habarlasa almaǵan. Osydan keıin telefonynyń joǵalǵanyn jáne depozıttik shotyndaǵy aqshanyń sheshilip alynǵanyn baıqaǵan. Jedel-izdestirý sharalary barysynda polıtsııa qyzmetkerleri kúdiktiniń kim ekenin anyqtady, — delingen polıtsııa taratqan habarlamada.
Aldyn ala aqparatqa qaraǵanda, kúdikti aqshany qumar oıynǵa jumsap, túgel utylyp qalǵan.
Qazir oqıǵanyń barlyq mán-jaıy anyqtalyp jatyr. Tergeý nátıjesine sáıkes, qoldanystaǵy zańnamaǵa saı protsessýaldyq sheshim qabyldanady.
Eske salaıyq, buǵan deıin Batys Qazaqstan oblysynda býhgalter 106 mln teńge bıýdjet qarjysyn qumar oıynǵa jumsaǵan.
