Aqmola oblysynda kóterem bolǵan jylqylar kóktemge jetpeýi múmkin – depýtat
ASTANA. KAZINFORM – Búgin Májilistiń jalpy otyrysynda depýtat Qazybek Isa Aqmola oblysynyń birneshe aýdanynda jylqy sany kúrt azaıyp bara jatqanyn aıtty. Bul turǵyda ol Úkimet basshysy Álıhan Smaıylovtyń atyna saýal joldady.
«Bıylǵy qalyń qar, qatty qys mal sharýashylyǵyna ońaı bolmaı tur. Ásirese, jylqy malyna asa aýyr tıip jatyr. Elimizdiń soltústik óńirlerinde «jem-shóptiń taýsylyp, dalada qardyń beti jappaı muz qursanyp, jylqylar tebindeı almaı, tolyqtaı qolǵa qaraǵan, ólim-jitim kóp» degen aqparattar bar. Sharýalar onsyz da jem-shóbi joq, jóndi sýbsıdııa berilmeıtin jylqy malynan aıyrylyp qalý qaýpi bar. Óıtkeni, jem-shóbi taýsylǵan fermerler de, qoradaǵy malyna qaraǵan aýyl adamdary da jylqyny arzan baǵada bolsa da, soǵym ornyna jappaı satyp jatyr», - dedi Q.Isa.
Onyń sózine qaraǵanda, Aqmola oblysynyń birneshe aýdanynda jylqy basynyń azaıyp bara jatqanyn aıtyp, dabyl qaqqandar kóp. Zerendi aýdanyndaǵy ondaǵan aýylda jurt jem-shóp tappaı, qınalyp otyr. Aqkól aýdanynyń malshylarynyń jaǵdaıy da máz emes. Shóptiń baǵasy tym sharyqtap ketip, bir oramy 20 myń teńgege deıin jetti.
«Buǵan basty sebep – jaıylym jáne shabyndyq jerlerdiń tapshylyǵy. Tipti, jaıylym jerinen múldem aıyrylyp qalǵan kóptegen aýyldarda jylqylar qolǵa qarap tur. Egindi eldiń irgesine deıin egip tastaǵan. Janarmaı quny 300 teńgeden asyp, aspandap ketken. Osyndaı qys qyspaǵy men qıyn-qystaýdyń kesirinen ár aýylda jylqylar ólip jatqany, qolyndaǵy bar jylqysyn tuıaq qaldyrmaı túgel satyp jibergen fermerler jaıly jazylyp jatyr. ıAǵnı, kóptegen aýyl turǵyndary kóterem bolyp jatqan kóp jylqy kóktemge jetpeı qalýy múmkin dep dabyl qaǵyp otyr. Aqmola oblysynyń málimeti boıynsha «bizde eshqandaı mal shyǵyny joq, bári tamasha» degenmen, bizge jetken hattar men «Egemen», «Qazaq úni», «Aıqyn» gazetterindegi aıqyn aqparattar basqasha sóıleıdi. Endeshe, tónip turǵan qaýiptiń aldyn alý úshin Úkimet deńgeıinde shuǵyl túrde keshendi sharalar qajet», - dedi depýtat.
Onyń paıymynsha, Úkimet pen quzyrly mınıstrlik, vedomstvolar, ákimdikter jylqy malyn aman alyp qalý úshin arnaıy «Jol kartasyn» jasaýy kerek. Sonymen qatar, Úkimet jylqyǵa sýbsıdııa berý máselesin qaıta qaraýy tıis.
«Respýblıkalyq bıýdjetten 2023 jyly jylqyǵa bar bolǵany 52,9 mln teńge bólinse, shoshqaǵa 2,1 mlrd teńge bólingen. ıAǵnı, shoshqaǵa bólingen qarjy jylqydan 40 esedeı kóp... Elimizdiń basym bóligi jemeıtin shoshqa etine degen sonshalyqty erekshe qamqorlyqtyń syry nede?! Jaıylym máselesi úshin memlekettik komıssııa qurylyp, jerdiń qanshalyqty ári qalaı paıdalanylyp jatqanyn túpkilikti tekserip, naqty sheshý kerek», - dedi Qazybek Isa.
