Aqmola oblysynda gaz datchıkteriniń arqasynda 30 adam aman qaldy
KÓKShETAÝ. KAZINFORM — Aqmola oblysynda bıylǵy órt oqıǵalarynyń negizgi sebebi elektr jabdyqtaryn ornatý jáne paıdalaný erejelerin buzýmen baılanysty bolǵan. Jylytý maýsymy bastalǵaly óńirde 45 órt oqıǵasy tirkelgen.
Bul týraly agenttikke oblystyq Tótenshe jaǵdaılar departamentiniń memlekettik órt baqylaý basqarmasynyń bastyǵy Erjan Gabbas habarlady. Onyń aıtýynsha, 2025–2026 jyldardyń jylytý maýsymy bastalǵaly óńirde 45 órt tirkelgen. Bul ótken jyldyń sáıkes kezeńimen salystyrǵanda 32,3 paıyzǵa kóp (2024 jyly – 34 órt).
— Osy jylǵy jylytý maýsymyndaǵy órtterdiń negizgi sebepteri: elektr jabdyqtaryn ornatý jáne tehnıkalyq paıdalaný erejelerin buzý – 29 jaǵdaı (64%), peshterdi ornatý men paıdalaný kezinde órt qaýipsizdigi erejelerin saqtamaý – 8 jaǵdaı (20%), turǵyndardyń otty abaısyz qoldanýy – 5 jaǵdaı (13%). Sonymen qatar eki jaǵdaıda ózdiginen tutaný (5%) tirkelgen, bir oqıǵada basqa sebep anyqtalǵan, — dedi Erjan Gabbas.
Óńirde aldyn alý sharalary keshendi túrde júrgizilgen. Negizgi nazar áleýmettik osal toptardyń úılerine aýdarylǵan. Qutqarýshylar turǵyn úılerdegi 900-ge jýyq tútin murjasyn tazalap, órt pen ystaný qaýpin azaıtqan. Sondaı-aq 11 myńnan astam kómirqyshqyl gazy datchıgi ornatylyp, qosymsha taǵy 1,5 myń qurylǵyny ornatý josparlanyp otyr.
— Sońǵy úsh jylda kómirqyshqyl gazynyń jeti datchıgi iske qosylyp, olardyń arqasynda oblystyń alty aýdanynda – Stepnogorsk qalasynda, Astrahan, Esil, Zerendi, Bulandy jáne Birjan sal aýdandarynda 30 adamnyń ómiri saqtalyp qaldy, — deıdi qutqarýshy.
Budan bólek, arnaıy tehnıkanyń ótýine kedergi keltirip turǵan kópqabatty turǵyn úıler aýmaǵyndaǵy 25 beton blok alynyp tastalǵan.
Eske sala keteıik, Astanadaǵy kópqabatty úıdegi órtten 33 adam evakýatsııalanǵanyn jazdyq.
Sondaı-aq jylý berý maýsymyndaǵy órttiń aldyn alý maqsatynda qutqarýshylar elordadaǵy jer úılerge reıd júrgizip jatyr.