Aqmola oblysynda kóliktik baqylaý ınspektsııasynyń 11 qyzmetkeri sottaldy

ASTANA. KAZINFORM – Kókshetaý qalalyq soty Aqmola oblysy boıynsha Kóliktik baqylaý ınspektsııasyndaǵy sybaılas jemqorlyqqa qatysty qylmystyq is boıynsha úkim shyǵardy, dep habarlaıdy Bas kólik prokýratýrasynyń baspasóz qyzmeti.

Sot aldynda burynǵy ınspektsııa bóliminiń basshysy, deldal jáne toǵyz júrgizýshi boldy. Tergeý barysynda laýazymdy tulǵanyń deldal arqyly tıisti ruqsat qujattary joq, sondaı-aq qaýipsizdik talaptaryn óreskel buza otyryp munaı ónimderin tasymaldaýǵa jalpy qamqorlyq kórsetkeni úshin júıeli túrde para alǵany anyqtaldy.

Sot barlyq fıgýranttardy para alý jáne berý deregi boıynsha kináli dep tanydy. Kólik prokýrorynyń ótinishhatyn qanaǵattandyryp, sot Kóliktik ınspektsııadaǵy sybaılas jemqorlyqqa jol bermeý maqsatynda Qazaqstan Respýblıkasy Kólik mınıstrliginiń atyna jeke uıǵarym shyǵardy.

Sot protsesi ınspektsııa qyzmetkerleriniń qatysýymen ashyq túrde ótti. Bul sybaılas jemqorlyqqa tózbeýshilik mádenıetin qalyptastyrýǵa baǵyttalǵan profılaktıkalyq jumystyń bir bóligi boldy.

- Úkim zańdy kúshine endi, - delingen habarlamada.

Osyǵan deıin ushaq, poıyz jáne teńiz kóliginiń jolaýshylary týraly aqparat arnaıy organdarǵa jiberiletini týraly jazdyq.