Aqmola oblysynda kólik qaqqan sileýsin aýyl turǵyndarynyń aýlalaryna kirip ketti
ASTANA. KAZINFORM – Áleýmettik jelilerde Aqmola oblysyndaǵy Azat aýyly turǵyndarynyń aýlasyna erekshe qonaq – sileýsinniń kelgeni týraly beıne taralyp jatyr, dep habarlaıdy Kazinform tilshisi.
- Er adam janýarǵa meıirimdilikpen tamaq usyndy, al jabaıy júndes janýar oǵan aıbat shekti, - delingen beınedegi jazbada.
Alaıda keıinirek sileýsinniń aýyl turǵyndarynyń aýlalaryna kezdeısoq kelmegeni belgili boldy.
QR Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń Aqmola oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, 2026 jyldyń 12 aqpanynda «Keńes orman sharýashylyǵy mekemesi» KMM-ne Aqkól aýdanyndaǵy Azat aýylynyń jergilikti turǵyndarynan aýylda jabaıy janýardyń baıqalǵany týraly habarlama kelip túsken. Sileýsin aqsap júrgen. Keıinirek janýardyń artqy aıaqtary synǵany anyqtaldy.
- Telefon habarlamasyn alǵannan keıin «Keńes orman sharýashylyǵy mekemesi» KMM dırektorynyń orynbasary V.Gazetov jabaıy janýardyń ornalasqan jerine dereý shyqty. Kelgen boıda ony «Lesostepnoe» ańshylyq sharýashylyǵynyń qoryqshysy A.Abass qarsy aldy, olar sileýsindi veterınarlyq emdeý jáne keıinnen «Býrabaı Damý» JShS-niń haıýanattar baǵyna ornalastyrý úshin kólikke saldy. Ári qaraı tergeý barysynda jabaıy janýardy bir kún buryn boljam boıynsha, «Azat-Stepnogorsk» tasjolynyń ýchaskesinde kólik qaǵyp ketkeni anyqtaldy, - dep habarlady vedomstvo.
Vızýaldy tekserý janýardyń artqy aıaqtarynyń tolyǵymen synǵanyn kórsetti. Ókinishke qaraı, sileýsin keıinirek aýyr jaraqattar men kóp qan joǵaltqannan ólip qaldy.
Eske sala ketsek, buǵan deıin Almatyda ıtti kólikten súıregen júrgizýshige qatysty is qozǵalǵanyn jazdyq.