Aqmola oblysynda kóligimen jol jıegine shyǵyp ketken 86 jastaǵy qarııany polıtsııa taýyp aldy
ASTANA. KAZINFORM – Aqmola oblysy Sandyqtaý aýdanyna qarasty Shańtóbe kentiniń 86 jastaǵy turǵyny kóligimen jolǵa shyǵyp, keıin habarsyz ketken. Qarııa úıine oralmaǵan soń, jaqyndary alańdap, telefon arqyly habarlasýǵa tyrysqanymen, tutqasyn eshkim kótermegen.
Zeınetkerdi izdestirý jumystary barysynda polıtsııa qyzmetkerleri onyń júrgen baǵytyn anyqtap, kóligin tapty.
Belgili bolǵandaı, jalǵyz turatyn qarııa VAZ-2107 avtokóligimen óz betinshe jolǵa shyqqan. Alaıda jol ústinde kólik joldan shyǵyp, jol jıegindegi saıǵa túsip ketken. Zeınetker kólikten ózdiginen shyǵa almaǵan. Onyń ústine jaqyndaryna habarlasyp, bolǵan jaǵdaıdy aıtýǵa da múmkindigi bolmaǵan.
Kelesi kúni Anatolıı Zaharovıchten áli de habar bolmaǵan soń, týystary Sandyqtaý aýdandyq polıtsııa bólimine júgingen.
– Jalǵyz turatyn zeınetker VAZ-2107 avtokóligimen óz betinshe jolǵa shyqqan. Alaıda qozǵalys kezinde kólik joldan shyǵyp, jol jıegindegi saıǵa túsip ketken. Qarııa kólikten ózdiginen shyǵa almaǵan ári jaqyndaryna habar bere almaǵan. Anatolıı Zaharovıch kelesi kúni baılanysqa shyqpaǵan soń, týystary alańdap, onyń joǵalǵany týraly Sandyqtaý aýdandyq polıtsııa bólimine dereý habarlaǵan, – delingen polıtsııa habarlamasynda.
Quqyq qorǵaý organdary qyzmetkerleri beınebaqylaý kameralaryndaǵy jazbalardy qarap, kóliktiń qaı baǵytqa júrgenin anyqtady. Osylaısha zeınetkerdiń yqtımal qozǵalys baǵyty qalpyna keltirildi.
Іzdestirý jumystary sol kúni nátıje berdi. Polıtseıler VAZ-2107 kóligin jol jıegindegi shuńqyrdan taýyp, onyń ishinen habarsyz ketken qarııany aman-esen alyp shyqty.
Tártip saqshylary zeınetkerge kómektesip, ony týystaryna tapsyrdy. Sondaı-aq kólikti evakýatsııalaýǵa da járdemdesti.
Anatolıı Zaharovıchtiń nemeresi polıtsııa qyzmetkerlerine jedel áreket etip, qıyn sátte otbasyna qoldaý kórsetkeni úshin alǵys aıtty.
– Sandyqtaý aýdanynyń polıtsııa qyzmetkerlerine jedel áreket etkeni, qıyn jaǵdaıda qoldaý kórsetip, janymyzdan tabylǵany jáne qajetti kómektiń bárin kórsetkeni úshin alǵysymdy bildirgim keledi, – dedi Anatolıı Zaharovıchtiń nemeresi.
Buǵan deıin Semeıde joǵalyp ketken er adamnyń máıiti tabylǵan edi.