Aqmola oblysynda kóktemgi egiske 500 myń tonnadan astam tuqym qajet
KÓKShETAÝ. KAZINFORM - Aqmola oblysynda óńirdiń jáne Qazaqstannyń basqa da óńirleriniń attestattalǵan tuqym sharýashylyǵy sýbektilerinen, sondaı-aq Reseı Federatsııasy men Eýropa elderinen 30 myń tonnaǵa jýyq jáne býdandastyrylǵan 10 myń tonnaǵa jýyq tuqym satyp alyndy.
Aqmola oblysynyń Aýyl sharýashylyǵy jáne jer qatynastary basqarmasynyń basshysy Kenesh Álimjanovtiń aıtýynsha, egis alqaptarynyń aldyn ala qurylymyna sáıkes oblys boıynsha jalpy jazdyq egis 5,3 mln ga quraıdy, onyń 4,8 mln ga dándi jáne dándi — burshaq daqyldary. Bul rette maıly daqyldar egisin 400 myń ga deıin, al jemshóp daqyldaryn 368,5 myń ga deıin ulǵaıtý josparda bar. Qazirgi kezde, aýyl sharýashylyǵy taýaryn óndirýshilerdi tuqymdyq materıalmen qamtamasyz etý jumystary júrgizilip jatyr.
«2024 jylǵy kóktemgi egiske tuqym qajettiligi 536,8 myń tonnany quraıdy. Ózderińiz biletindeı, ótken jylǵy kúzdegi jaýyn-shashyn astyqtyń sapasyna aıtarlyqtaı áser etti. Osyǵan baılanysty oblystyń aýyl sharýashylyǵy taýaryn óndirýshiler bıylǵy egiske qajetti tuqymdyq materıalmen qamtamasyz etý máselesin erte bastan sheshýge kiristi. Jyl basynan beri Aqmola oblysynda óńirdiń jáne Qazaqstannyń basqa da óńirleriniń attestattalǵan tuqym sharýashylyǵy sýbektilerinen, sondaı-aq Reseı Federatsııasy men Eýropa elderinen 30 myń tonnaǵa jýyq jáne býdandastyrylǵan 10 myń tonnaǵa jýyq tuqymy satyp alyndy», — dedi Kenesh Álimjanov.
Basqarma basshysy atap ótkendeı, qarjylandyrýdy kútip otyrǵan, ýaǵdalastyqtary bar nemese kóktemgi egis jumystaryna tuqymmen tolyq qamtamasyz etý úshin tóleýge tıisti kelisimsharttar jasalǵan sharýashylyqtar bar.
«Oblystyń iri jáne orta aýyl sharýashylyǵy taýaryn óndirýshileriniń negizgi bóligi kóktemgi egis jumystaryn júrgizý úshin tuqymmen tolyq kólemde qamtamasyz etilgen. Sonymen qatar, attestattalǵan sharýashylyqtarda satýǵa 5 myń tonnaǵa jýyq tuqym bar. Óńirde „azyq-túlik korporatsııasy“ arqyly taýarlyq kredıt berý arqyly azyq-túlik astyǵyn tuqym retinde satýdyń 2024 jylǵa arnalǵan baǵdarlamasy jumys isteıdi», — dep túıindedi Kenesh Álimjanov.
Eske salaıyq, ótken jyldyń kúzinde aqmolalyq dıqandar 3 mıllıon tonadan astam astyq jınady.
