Aqmola oblysynda kóktaıǵaqqa qaramastan jazǵy dóńgelekpen shyqqan júrgizýshiler joldan qaıtaryldy
ASTANA. KAZINFORM — Aqmola oblysynda kóktaıǵaqtyń alǵashqy kúninde myńnan astam kóliktiń qozǵalysy shekteldi. Bul týraly Aqmola oblysy PD baspasóz qyzmeti habarlady.
Aýa raıynyń kúrt nasharlaýyna jáne kóktaıǵaqtyń paıda bolýyna baılanysty Aqmola oblysynyń polıtsııa qyzmetkerleri qyzmet ótkerýdiń kúsheıtilgen rejımine kóshti. Bul kúni 200-ge jýyq patrýldik polıtsııa qyzmetkeri aımaq joldarynda qaýipsizdikti qamtamasyz etti.
Tek birinshi kúni 1064 kóliktiń qozǵalysy shekteldi, olardyń júrgizýshileri jazǵy dóńgelekpen jolǵa shyqqan.
Mundaı jaǵdaılardyń eń kóp sany oblystyq jáne respýblıkalyq trassalarda — 430 fakt, Kókshetaý oblystyq ortalyǵynda — 100-ge jýyq, qalǵandary aýdandyq joldarda tirkeldi.
— Birneshe ret eskertýlerge qaramastan, kóptegen júrgizýshi jazǵy shınamen shyǵýǵa táýekel etti. Qabyldanǵan sharalar men patrýlderdiń jumystarynyń arqasynda bul kúni zardap shekken nemese adam qaza tapqan jol apaty tirkelgen joq, — dep atap ótti Aqmola oblysy PD bastyǵynyń orynbasary polıtsııa polkovnıgi Serik Abýtalıpov.
Aıta ketý kerek, polıtseıler joldarda qıyn jaǵdaıǵa tap bolǵan júrgizýshige de kómek kórsetti.
Sonymen qatar, óńirdiń jol qyzmetteri kóktaıǵaqtyń saldaryn joıý boıynsha belsendi jumys júrgizdi. Respýblıkalyq mańyzy bar trassalardy tazalaý úshin táýligine 190 jol tehnıkasy jumyldyryldy, 900 tonnadan astam kóktaıǵaqqa qarsy materıal paıdalanyldy.
Aıta ketelik 4 qarashada elimizdiń basym bóliginde qar jaýatyny týraly jazǵan edik.