Aqmola oblysynda kóktaıǵaq saldarynan 15 jańa kólik tıelgen eki júk kóligi aýdaryldy
ASTANA. KAZINFORM — Qorǵastan shyǵyp Reseı Federatsııasyna bara jatqan jańa avtomobılder tasymaldaǵan júk kólikteri apatqa ushyrady, dep habarlaıdy Kazinform tilshisi.
Aqmola oblystyq polıtsııa departamentiniń baspasóz qyzmetiniń málimetinshe, eki úlken kóliktiń qatysýymen bolǵan jol-kólik oqıǵasy 2026 jyldyń 13 qarashasynda Astana-Atbasar-Jaqsy avtojolynyń 131-shi shaqyrymynda boldy.
— Aldyn ala málimetter boıynsha, sheteldik júrgizýshiler tizgindegen «FAW» avtokólik tasymaldaýshylary 15 jańa kólikten turatyn úlken partııany Qorǵastan Reseı Federatsııasyna alyp bara jatqan. Birinshi júk kóliginiń júrgizýshisi kóktaıǵaqqa baılanysty kólikti basqara almaı qalǵan. Soqtyǵysý saldarynan kóp tonnaly júk kólikteri joldan shyǵyp, aýdarylyp ketken, — delingen polıtsııa málimdemesinde.
Polıtsııanyń málimetinshe, apat saldarynan eshkim zardap shekken joq. Sonymen qatar, avtokólik tasymaldaýshy júrgizýshige qatysty ákimshilik hattama toltyryldy.
Polıtsııa qyzmetkerleri júrgizýshilerge, ásirese úlken kólikterdi júrgizgen kezde, jol qozǵalysy erejelerin qatań saqtaý qajettigin eske salady.
— Qys kele jatyr, kún sýytyp, joldardyń muz qatýyna baılanysty jol-kólik oqıǵalarynyń qaýpi aıtarlyqtaı artady. Apattyń aldyn alý úshin júrgizýshilerge jyldamdyqty azaıtý, qaýipsiz qashyqtyqty saqtaý, shuǵyl tejeý jáne manevr jasaýdan aýlaq bolý jáne qysqy shınalardy tez arada ornatý qajettigin eskertemiz, — deıdi polıtseıler.
Buǵan deıin Aqmola oblysynda jol apatynan bir adam qaza taýyp, bes adam aýrýhanaǵa túskenin habarlaǵan edik.
