Aqmola oblysynda qoǵam belsendisin óltirgender sottaldy
KÓKShETAÝ. KAZINFORM - Aqmola oblysynda qoǵam belsendisiniń ólimine kináli tórt adamǵa qatysty sot úkimi shyqty. Sot kinálilerge 3 jyldan 16 jylǵa deıin bas bostandyǵynan aıyrý jazasyn taǵaıyndady.
Aqmola oblysy sotynyń baspasóz qyzmetiniń málimetinshe, oblystyq mamandandyrylǵan aýdanaralyq qylmystyq ister jónindegi sotynda qoǵam belsendisiniń ólimine kánili toptasqan tórt adamǵa qatysty qylmystyq is qaraldy. Olarǵa bir top adamnyń sóz baılasýy, adamnyń densaýlyǵyna ortasha aýyrlyqtaǵy zııan keltirý, atys qarýyn alý, saqtaý, qoldaný, sondaı – aq, adam óltirý (jaldaý boıynsha) aıyby taǵyldy.
Sot anyqtaǵandaı, jábirlenýshini 2019 jyly óz úıiniń aýlasynda myltyqpen atyp óltirgen. Óltirer aldynda betterin tumshalaǵan sottalýshylar qoǵam belsendisiniń úı aýlasyna kirgen, terezeni syndyryp, artynsha, ony uryp-soqqan.
Qylmystyq is alqabılerdiń qatysýymen qaraldy. Alqabılerdiń úkimimen sottalýshylardyń tórteýi de kináli dep tanyldy.
«Sot qylmysty uıymdastyrǵan eki adamdy Qylmystyq kodekstiń 28 babynyń 3 bóligi, 107 babynyń 2 bóligi, 4 bólimshesi, 99 babynyń 2 bóligi 7, 8 bólimshesi boıynsha kináli dep tanyp, árqaısysyna 15 jyl 6 aı bas bostandyǵynan aıyrý jasasyn taǵaıyndady. Sonymen birge, bireýiniń «polıtsııa podpolkovnıgi» ataǵynan aıyrdy. Al qylmysty oryndaǵan eki adamnyń biriniń áreketinde qaýipti retsıdıv bar dep tanyldy. Ol Qylmystyq kodekstiń 293 babynyń 3 bóligi, 107 babynyń 2 bóligi 4 bólimshesi, 99 babynyń 2 bóligi 7, 8 bólimshesi, 106 babynyń 1 bóligi, 287 babynyń 2 bóligi boıynsha kináli dep tanyldy, 16 jylǵa bas bostandyǵynan aıyrý jazasynan kesildi. Ekinshi oryndaýshyǵa Qylmystyq kodekstiń 107 babynyń 2 bóligi 4 bólimshesi boıynsha 3 jylǵa bas bostandyǵynan aıyrý jazasy taǵaıyndaldy. Alaıda, ol jazany óteý merziminiń ótýine baılanysty jazasyn óteýden bosatyldy», - dedi vedomstvodan.
Sot úkimi zańdy kúshine engen joq.
Aıta ketsek, budan buryn memleketaralyq izdeýde júrgen qylmysker Kókshetaýda ustalǵanyn jazǵan edik.
