Aqmola oblysynda qyzylsha juqtyrý 3,2 esege ósken

Aqmola oblysynda jyl basynan beri qyzylsha juqtyrýdyń 206 deregi tirkeldi, onyń ishinde 139 jaǵdaı rastaldy, dep habarlaıdy Kazinform.

Aqmola oblysy boıynsha sanıtarlyq-epıdemıologııalyq baqylaý departamentiniń basshysy Aınagúl Mýsınanyń málimetinshe, sońǵy birer aıda óńirde qyzylsha juqtyrǵandar sany artqan.

– Jyl basynan beri Aqmola oblysynda qyzylsha juqtyrǵandar sany 206 adamǵa jetse, 139 jaǵdaıda (zerthanalyq – 104 jaǵdaı (74.8%), epıdemıologııalyq baılanys boıynsha – 11 (7.9%), klınıkalyq – 24 (17.2%) rastaldy. Úshinshi toqsanda 11 jaǵdaı tirkeldi. Al tórtinshi toqsannyń qazan jáne qarasha aılarynda barlyǵy 26 jaǵdaı anyqtaldy. Bul sáıkesinshe úshinshi toqsanmen salystyrǵanda 3,2 esege kóp, – dedi Aınagúl Mýsına. 

Aıtýynsha, aýyrǵandardyń 84,8 paıyzy qyzylshaǵa qarsy ekpe almaǵan. Naýqastardyń 44 paıyzy ózderi nemese olardyń ata-analary bas tartqandyqtan ekpe almaǵan.

Oblys boıynsha qosymsha jappaı ımmýndaýǵa 44 600 adam jatady, onyń ishinde 6-10 aılyq jas aralyǵyndaǵy balalar.

– 27 qarashadaǵy jaǵdaı boıynsha oblysta 27 naýqas aýrýhanaǵa jatqyzyldy. Barlyǵynyń jaǵdaı ortasha deńgeıde, - dep tolyqtyrdy Aınagúl Mýsına.

Qazirgi kezde, oblysta 11 500 mólsher ekpe bar, qarasha aıynda 43 350 mólsher jáne jeltoqsan aıynda 3 250 mólsher jetkizý josparlanǵan. 

Oblys boıynsha 1 jasqa deıingi balalardy qyzylshaǵa qarsy vaktsınatsııamen qamtý 83,6 paıyzdy qurady, talap etilgeni keminde – 79,2 paıyz. Vaktsınatsııamen nysanaly toptyń ishinen 9 963 bala qamtyldy.

Aıta ketsek, budan buryn Qazaqstanda qyzylsha órship turǵany týraly jazǵan edik.