Aqmola oblysynda Qylshaqty ózeninde úsh bala muz astyna túsip ketti

ASTANA. KAZINFORM – Aqmola oblysynda áli tolyq qatpaǵan Qylshaqty ózeninde oınap júrgen úsh bala sýǵa qulap ketti. Qazir qutqarýshylar olardy ajaldan arashalap qalǵan azamatty izdestirip jatyr.

Oblystyq TJD málimetinshe, oqıǵa 16 qarashada bolǵan. Toǵyz, segiz jáne jeti jastaǵy balalar juqa muzda oınap sýǵa túsip ketken.

– Oqıǵanyń aldyn alý kýágerdiń jedel áreketteriniń arqasynda múmkin boldy. Ol jaǵdaıdy baıqap, balalardy shyǵaryp alyp, jedel járdem brıgadasyna tapsyrǵan. Orta deńgeıli úsik belgileri bar zardap shekkender kópsalaly oblystyq balalar aýrýhanasyna jetkizildi. Qajetti medıtsınalyq sharalardan keıin balalar ambýlatorlyq em qabyldaý úshin úılerine jiberildi, – dep habarlady óńirlik TJD-nyń resmı ókili Ersaıyn Qoıshybaev.

TJD qyzmetkerleri qutqarýshy azamatty taýyp, ony memlekettik nagradaǵa usynbaq. Sonymen birge turǵyndarǵa juqa muzǵa shyǵý qaýipti ekeni eskertildi. Sońǵy tórt kúnde jaramsyz muzǵa shyqqany úshin 35 adam ÁQBtK-niń 412-baby boıynsha ákimshilik jaýapkershilikke tartylǵan. Muzdyń qaýipsiz qalyńdyǵy jeke adam úshin keminde 10 sm, birneshe adam úshin 20 sm.

Buǵan deıin qutqarýshylar elorda turǵyndarynyń Esil ózeni men Botanıkalyq baqtaǵy sý qoımalaryndaǵy muzǵa shyǵyp ketýlerine baılanysty eskertý jasaǵan edi.