Qaıtarylǵan aktıvter: Qosshy men Makınsk qalalaryn sýmen qamtýǵa qarjy bólinedi
ASTANA. KAZINFORM – Memleket basshysynyń tapsyrmasyna sáıkes, Úkimet zańsyz ıemdenilgen aktıvterdi qaıtarý esebinen áleýmettik mańyzy bar ınfraqurylym nysandaryn salý jobalaryn júzege asyrýda. Bul týraly Úkimetten habarlady.
Aqmola oblysyndaǵy Qosshy jáne Makınsk qalalarynyń turǵyndaryn sýmen qamtamasyz etý úshin Arnaýly memlekettik qordan qarajat bólý týraly sheshim qabyldandy.
Qosshy qalasynda sý qubyry júıesiniń qurylysyn aıaqtaýǵa 476,7 mln teńge bólindi. Jobany iske asyrý nátıjesinde halyq 100% ortalyqtandyrylǵan sýmen qamtylady. Qazirgi tańda shamamen 50 shaqyrym qubyr tartylǵan. Jalpy, jelilerdiń uzyndyǵy 64,1 shaqyrym bolady dep josparlanyp otyr. Nysandy jyl sońyna deıin tapsyrý kózdelgen. Qoldanystaǵy ınjenerlik jeli 30 myń turǵynǵa eseptelgen. Al resmı derekterge sáıkes, búginde Qosshyda 50 myńnan astam adam tirkelgen. Qalanyń bas josparyna sáıkes, 2038 jylǵa qaraı turǵyndar sany 150 myńnan asady dep boljanýda.
Makınsk qalasynda sý qubyry jelilerin qaıta jańartý jumystary júrgizilýde. Joba boıynsha 72,7 shaqyrym jeli tartý qarastyrylǵan. Buǵan deıin bólingen qarajat esebinen búginde 45 shaqyrym boıynsha jumys aıaqtalǵan. Arnaýly memlekettik qordan bólingen 606,4 mln teńge jobany tolyq aıaqtap, halqy 18 myńnan asatyn qalany ortalyqtandyrylǵan sýmen qamtamasyz etýge múmkindik beredi.
Zańsyz shyǵarylǵan aktıvterdi qaıtarýdan túsken qarajatty áleýmettik máselelerdi sheshýge baǵyttaý týraly Memleket basshysynyń tapsyrmasyn oryndaý áleýmettik ınfraqurylymdy jańǵyrtýdyń tıimdi tetigine aınaldy. Búgingi tańda Arnaýly memlekettik qordan bilim berý, densaýlyq saqtaý, sport, áleýmettik qamsyzdandyrý, ınjenerlik jeliler men sý qurylystaryn jańartý sııaqty salalardaǵy 280-ge jýyq jobany iske asyrýǵa qarajat bólindi.
Buǵan deıin qaıtarylǵan aktıvter esebinen Aqtóbe oblysynda medıtsınalyq mekemelerdiń qurylysyna 1,4 mlrd teńge bólingen.