Aqmola oblysynda qaıtarylǵan aktıvter esebinen ambýlatorııa salynyp jatyr

ASTANA. KAZINFORM — Aqmola oblysynda prokýratýra kómegimen qaıtarylǵan aktıvter dárigerlik ambýlatorııa salýǵa baǵyttaldy, dep habarlaıdy oblystyq prokýratýranyń baspasóz qyzmeti.

Jarqaıyń aýdanynyń prokýrory Oljas Ýálıev jergilikti atqarýshy organdardyń ókilderimen birge Pıatıgorskoe aýylynda salynyp jatqan dárigerlik ambýlatorııa qurylysynyń barysymen tanysty. Bul nysan — prokýratýra organdary memleketke qaıtarǵan qarajat esebinen salynyp jatqan áleýmettik joba.

— Ambýlatorııa alty eldi mekenniń 1800-den astam turǵynyn alǵashqy medıtsınalyq kómekpen qamtý úshin salynyp jatyr. Qazirgi ýaqytta qurylys jumystarynyń 95%-y aıaqtalǵan, — delingen prokýratýra habarlamasynda.

Vedomstvo deregine sáıkes, jospar boıynsha, nysan osy jyldyń úshinshi toqsanynda tolyq paıdalanýǵa beriledi.

Buǵan deıin Almatyda qaıtarylǵan qarajat esebinen salynǵan feldsherlik pýnkt paıdalanýǵa berilgenin jazdyq.