Aqmola oblysynda qatty turmystyq qaldyqtar máselesi qalaı sheshilýde?
KÓKShETAÝ. KAZINFORM – Aqmola oblysynyń aýmaǵynda 130 qatty turmystyq qaldyqtar polıgony bar bolsa(jer aktileri bar), sonyń 25 ǵana zańdastyrylǵan. Osylaısha, ekologııalyq talaptar men sanıtarlyq qaǵıdalarǵa sáıkes keletin qatty turmystyq qaldyqtardy ornalastyrý obektileriniń úlesi 18,7 paıyzdy quraıdy.
Aqmola oblysy boıynsha ekologııa departamentiniń málimetinshe, oblystyń tabıǵı resýrstar jáne tabıǵatty paıdalanýdy retteý basqarmasy tarapynan qazirgi tańda qatty turmystyq qaldyqtar polıgonyn salý boıynsha jumystar júrgizýde, tehnıkalyq-ekonomıkalyq negizdemesi jobasy 2024 jyly saraptamadan ótizkizilmekshi.
Aqmola oblysy boıynsha Aqkól, Arshaly, Býrabaı, Birjan sal, Egindikól, Zerendi, Qorǵaljyn, Tselınograd aýdandary jáne Qosshy qalasynda birde-bir zańdastyrylǵan qoqys polıgony joq.
Máselen, 2023 jyly Zerendi aýdanynda 227 ruqsat etilmegen qoqys úıindileri anyqtalyp, onyń 187 (87%) joıyldy.
Qazirgi ýaqytta Aqmola oblysynyń tabıǵı resýrstar jáne tabıǵatty paıdalaný retteý basqarmasy Kókshetaý, Şýche, Aqkól, Qosshy qalalarynda jáne Arshaly, Qorǵaljyn, Qoıandy, Zerendi aýyldarynda polıgondardy salý máselesi kún tártibinde tur.
«Aqmola oblysynyń «Kókshetaý qalasynda qoqys suryptaý pýnkti bar qatty turmystyq qaldyqtardyń jańa polıgonyn salý» tehnıkalyq-ekonomıkalyq negizdemesiniń (TEN) túzetýi aıaqtaldy. Al Zerendi aýdanynda Azamattyq avıatsııa komıtetiniń kelisimi alynyp, Vasılkovka aýyly men Jamanaşy stantsııasynda qoǵamdyq tyńdaýlar ótkizildi. Joba ekologııalyq saraptamaǵa jiberildi. Şýche qalasynda qatty turmystyq qaldyqtar polıgonynyń qurylysyna jobalyq-smetalyq qujattamalar ázirleý aıaqtaldy. Mundaǵy polıgon qurylysynyń boljamdy quny 3,8 mlrd teńgeni quraıdy. Skrınıngtik qorytyndy alynyp, qoǵamdyq tyńdaýlar taǵaıyndaldy», - dedi Aqmola oblysy boıynsha ekologııa departamentiniń baspasóz qyzmetinen.
Vedomstvodan atap ótkendeı, osyndaı jumystar Qosshy qalasy, Tselınograd, Arshaly, Qorǵaljyn, Qoıandy, aýdandarynda júzege asyrylyp jatyr.
Zańdastyrylǵan qatty turmystyq qaldyqtar palıgonynyń bolmaýy kúl-qoqystyń jón-josyqsyz tógilýine ákelip soqtyrdy.
«2023 jyly «Qazaqstan Ǵarysh Sapary UK» AQ ǵaryshtan túsirgen sýretter negizinde Aqmola oblysynda 789 ruqsat etilmegen qaldyqtardy ornalastyrý oryndary anyqtaldy. Departament Aqmola oblysy aýdandarynyń ákimdikterimen birlesip 631 (80%) ruqsat etilmegen qoqys úıindilerin joıdy. 2023 jyly ruqsat etilmegen qoqys úıindilerin joıý jóninde sharalar qoldanbaǵany úshin - 3 laýazymdy tulǵa (Tselınograd aýdany ákiminiń orynbasary, Qosshy qalasy ákiminiń orynbasary, Arshaly aýdany TKSh basshysy), 5 zańdy tulǵa - 13 jeke tulǵa (aıyppuldyń jalpy somasy - 1 216 129 teńge) ákimshilik jaýapqa tartyldy», - dep tolyqtyrdy vedomstvodan.
Aıta ketsek, budan buryn Aqmola oblysynda Kókshetaý qalasy men 9 aýdanda zańdastyrylǵan qoqys polıgony joqtyǵyn jazǵan edik.
