Aqmola oblysynda kásipkerlerge 60 mln teńgeden astam qarjy qaıtaryldy
ASTANA. KAZINFORM – Atbasar aýdany prokýratýrasy memlekettik satyp alý sharttary boıynsha mindettemelerin oryndaǵan 27 kásipkerdiń quqyǵyn qorǵap, olarǵa tıesili aqshalaı qarajat qaıtaryldy.
Memlekettik satyp alý týraly zańnama talaptaryna sáıkes engizilgen kepildik soma kásipkerler óz mindettemelerin tıisinshe oryndaǵannan keıin dereý qaıtarylýǵa jatady.
— Aqmola oblysy bilim basqarmasynyń Atbasar aýdany boıynsha bilim bólimi sharttyq mindettemelerdiń ýaqytyly oryndalýyna qaramastan, úsh jyldan astam ýaqyt boıy oryndalǵan shart boıynsha kepildik somany qaıtarmaǵan. Olardyń jalpy somasy 60 mln teńgeden asty, — delingen habarlamada.
Qabyldanǵan prokýrorlyq yqpal etý sharalarynyń nátıjesinde kásipkerlerdiń buzylǵan quqyqtary qalpyna keltirildi.
Zań buzýshylyqtarǵa jol bergen kináli laýazymdy tulǵalar tártiptik jaýapkershilikke tartyldy.
Aıta ketelik Pavlodarlyq dárigerlerge prokýratýranyń aralasýymen 15 mln teńge jalaqy qaıtarylǵan edi.
