Aqmola oblysynda qarasha jyly bastalyp, aı sońynda aıaz kúsheıedi
ASTANA. KAZINFORM — Aqmola oblysynda qarasha aıyndaǵy ortasha aýa temperatýrasy klımattyq normadan 2°S joǵary bolady dep boljanyp otyr. Aıdyń basynda jańbyr men jylbysqy qar jaýýy múmkin. Bul týraly Kazinform agenttiginiń tilshisi habarlady.
«Qazgıdromet» RMK Aqmola oblysy boıynsha fılıaly 2026 jylǵy qarasha aıyna arnalǵan konsýltatıvtik aýa raıy boljamyn jarııalady. Mamandardyń málimetinshe, bıylǵy qarasha aıyndaǵy aýa raıy 2024 jylǵy qarashaǵa uqsas bolady.
Sınoptıkterdiń boljamyna sáıkes, aılyq ortasha aýa temperatýrasy -3,6…-5,6°S shamasynda bolady. Bul klımattyq normadan 2°S joǵary.
Aıdyń alǵashqy onkúndiginde aýa temperatýrasy qubylmaly bolady. Alǵashqy kúnderi túngi temperatýra 0…-5°S-tan, oblystyń ońtústik-shyǵysynda +2°S-tan 0…+5°S-qa deıin kóteriledi. Kúndiz aýa temperatýrasy 0…+5°S-tan +7…+12°S-qa deıin joǵarylaıdy.
Odan keıin aýa raıy birtindep sýytady. Túnde temperatýra -4…-9°S-qa deıin tómendep, oblystyń soltústiginde -12°S-qa jetedi. Kúndiz 0…-5°S bolady.
Onkúndiktiń sońynda kún qaıta jylynady. Túnde aýa temperatýrasy 0…-5°S, kúndiz 0…+5°S, oblystyń ońtústiginde +8°S shamasynda bolady.
Ekinshi onkúndikte túngi aýa temperatýrasy 0…-5°S pen -7…-12°S aralyǵynda qubylady. Kúndiz 0…+5°S-tan -1…-6°S-qa deıin tómendeýi múmkin.
Úshinshi onkúndikte de temperatýranyń qubylýy jalǵasady. Túnde aýa temperatýrasy -1…-6°S-tan -7…-12°S-qa deıin tómendeıdi. Oblystyń ońtústiginde túngi temperatýra -2°S shamasynda bolady.
Kúndiz aýa temperatýrasy 0…+5°S pen -1…-6°S aralyǵynda qubylyp, oblystyń ońtústiginde +3°S-qa deıin kóteriledi. Onkúndiktiń sońynda túnde -10…-15°S, kúndiz -3…-8°S aıaz kútiledi.
Jaýyn-shashyn, tuman jáne kóktaıǵaq
Sınoptıkterdiń boljamynsha, oblystyń soltústik bóliginde aılyq jaýyn-shashyn mólsheri klımattyq normadan joǵary, al ońtústik bóliginde norma shamasynda bolady. Qarasha aıyndaǵy qalypty jaýyn-shashyn mólsheri — 18–33 mm.
- Aıdyń basynda: jańbyr men jylbysqy qar jaýady.
- Aıdyń alǵashqy onkúndiginiń ortasy men sońynda, ekinshi jáne úshinshi onkúndikterdiń basynda: qar jaýyp, burqasyn soǵýy múmkin.
- Tuman: aıdyń basy men ortasynda, sondaı-aq úshinshi onkúndiktiń ortasynda kútiledi.
- Kóktaıǵaq: alǵashqy onkúndiktiń basy men sońynda jáne ekinshi onkúndiktiń basynda bolýy yqtımal.
Buǵan qosa, aıdyń alǵashqy jartysynda, sondaı-aq úshinshi onkúndiktiń basy men sońynda jeldiń ekpini 15–20 m/s-qa deıin jetýi múmkin.
Buǵan deıin aldaǵy úsh kúnde jańbyr jaýyp, qaı óńirlerge qar túsetinin jazdyq.
