Şýche kóli jaǵalaýyndaǵy 53,4 mln teńgeniń jer ýchaskesi memleketke qaıtaryldy
ASTANA. KAZINFORM – Býrabaı aýdany prokýratýrasynyń bastamasymen Jer resýrstaryn basqarý departamenti «Kıpros» JShS-niń paıdalanýyndaǵy jer ýchaskesine ıelik etý zańdylyǵyna tekserý júrgizildi.
Tekserý barysynda seriktestik 2012 jyldan beri Şýche kóli jaǵalaýynda ornalasqan 3 gektar jer ýchaskesin ıelenip kelgeni anyqtaldy.
Jer zańnamasynyń talaptaryn buza otyryp, 10 jyldan astam ýaqyt boıy jer ýchaskesi ıgerilmegen, qurylys jumystary bastalmaǵan.
Aqmola oblysynyń prokýratýrasy málimetinshe, 2023 jyly jer paıdalanýshyǵa ýchaskeni ıgerý týraly mindetti nusqama berilgen, alaıda 2024 jyly eshqandaı sharalar qabyldanbaǵan.
Tekserý nátıjeleri boıynsha departament sotqa júgindi. Mamandandyrylǵan aýdanaralyq ekonomıkalyq sottyń sheshimimen kadastrlyq quny 53,4 mln teńge bolatyn jer ýchaskesi memleket menshigine ótti.
Qoldanyssyz jatqan jerlerdi qaıtarý jumystary jalǵasyp jatyr jáne aýdan prokýratýrasynyń turaqty baqylaýynda.
Aıta keteıik, jer komıssııasy memleketke 12,8 mln gektar jerdi qaıtardy.