Aqmola oblysynda «Jańa Dala / Green Day ‘2025» kórmesi bastaldy
ASTANA. KAZINFORM – Aqmola oblysynda «Jańa Dala / Green Day ‘2025» iri mamandandyrylǵan kórme-demonstratsııasy bastaldy.
22 elden kelgen (Aýstrııa, Ulybrıtanııa, Germanııa, Qytaı, Nıderland, AQSh, Frantsııa, Japonııa jáne t.b.) 200-den astam kompanııany biriktirgen is-sharany QR Aýyl sharýashylyǵy mınıstrliginiń qoldaýymen «EXPO TIME» JShS uıymdastyrdy.
«Jańa Dala / Green Day ‘2025» kórmesi agroónerkásiptik keshendi damytý, tájirıbe almasý jáne otandyq agrosektordy halyqaralyq deńgeıde ilgeriletý úshin strategııalyq mańyzy bar alań retinde óz tıimdiligin taǵy bir márte dáleldedi.
– Ótken jyly biz bul alańda jańa qoldaý quraldaryn tanystyrdyq: kóktemgi egis jumystaryn jeńildetilgen qarjylandyrý, lızıng, kepildik berý, nesıe arnalarynyń keńeıýi. Memleket basshysynyń tapsyrmasy boıynsha biz 2024 jyldyń qarashasynda-aq 2025 jylǵy egis naýqanyn qarjylandyrýǵa ótinim qabyldaýdy bastadyq. Erte qarjylandyrý tájirıbesin turaqty júıege aınaldyrýdy josparlap otyrmyz, – dedi mınıstr kórmeniń ashylýynda.
Aıdarbek Saparov egistik alqaptaryn ártaraptandyrý, jer resýrstaryn turaqty paıdalaný, sýarý tehnologııalaryn engizý jáne mal sharýashylyǵyn damytý máselelerine erekshe nazar aýdardy.
Bıyl monomádenıet egiletin alqaptar 332 myń gektarǵa qysqartylyp, maıly, burshaq jáne mal azyqtyq daqyldardyń egisi ulǵaıtyldy. Sýarmaly eginshilikti qoldaý baǵdarlamasy belsendi júzege asyrylyp jatyr, jańa Sý kodeksi qabyldandy, sý resýrstaryn tıimdi paıdalaný boıynsha sharalar engizilip jatyr. Sońǵy jyldary zamanaýı sút-taýarly fermalarynyń sany 19-dan 88-ge deıin artty. Bul jyl saıyn 600 myń tonnaǵa deıin qosymsha sút óndirýge múmkindik beredi.
Qoldaý sharalaryn keńeıtý jumystary jalǵasyp jatyr: asyltuqymdy mal satyp alýǵa, aınalym qarajatyn nesıeleýge arnalǵan baǵdarlamalar ázirlenip jatyr, óńirlik tabysty tájirıbe masshtabtalyp jatyr.
Qazaqstan eksporttyq áleýetin nyǵaıtýdy jalǵastyryp keledi. 2025 jyly jún men teri eksportyna salynǵan baj alymdary alynyp tastaldy, 15 eksporttaýshy kompanııa satyp alý kólemin ulǵaıtty. Baldy EO elderine, qus etin Qytaıǵa eksporttaýǵa ruqsattar alyndy, jylqy eti, sút jáne akvakýltýra ónimderin Eýropa elderine shyǵarý boıynsha kelissóz júrgizilip jatyr.
– Aýqymdy jumystar atqaryldy, alda odan da kóp is kútip tur. Mınıstrlik agrobıznespen, Parlamentpen, sarapshylar qaýymdastyǵymen turaqty dıalog júrgizip jatyr. «Jańa Dala / Green Day» sııaqty alańdar – bizdi bir-birimizdi tyńdaýǵa, qoldaý is-sharalaryn jetildirýge jáne sheshimderdi jedel qabyldaýǵa múmkindik beretin mańyzdy qura», – dep atap ótti mınıstr.
Kórme aıasynda Aqmola oblysynyń agroónerkásip salasynyń 16 úzdik qyzmetkerine salalyq nagradalar men Qurmet gramotalary tabystaldy. Qazaqtyń aqbas tuqymynyń 75 jyldyǵyna oraı respýblıkalyq palata músheleri marapattaldy. Mınıstr aýyl sharýashylyǵy janýarlary, tehnıkasy men jabdyqtary, aýyl sharýashylyǵy daqyldarynyń selektsııalyq jetistikteri usynylǵan kórmelerdi aralap kórdi.
Bıylǵy ekspozıtsııa alańy – 70 000 sharshy metr. Onda 500-den astam joǵary ónimdi tehnıka, jabdyqtar men ınnovatsııalyq sheshimder usynyldy. Kórme aıasynda Qazaqstan veterınarııalyq mamandarynyń alǵashqy Quryltaıy jáne «Úzdik buqa» aýktsıony uıymdastyrylady.
– Bizdiń kórme agrarlyq sektordaǵy eń kóp kútiletin is-sharalardyń biri ekeni sózsiz. Biz qazirdiń ózinde óńirlik deńgeıden asyp, halyqaralyq mártebege qol jetkizdik. Aýyl sharýashylyǵy mınıstrliginiń agrarshylardy qoldaý, asyltuqymdy mal sharýashylyǵyn damytý, ınnovatsııalardy engizý jáne eksporttyq áleýetti keńeıtý baǵytyndaǵy júıeli jumysynyń arqasynda osyndaı aýqymdy is-sharalardy ótkizý múmkin bolyp otyr. Búgingi kórme aıasynda mańyzdy kelisimder jasalyp, otandyq aýyl sharýashylyǵy óndirýshileri sheteldik áriptesterimen tájirıbe almasyp, iskerlik seriktesterin taýyp jatyr. Kórmeniń negizgi maqsatyna qol jetkizildi, – dedi «EXPO TIME» JShS dırektory Ádilhan Saǵynbaev.
Aldyn ala esep boıynsha, kórmeniń alǵashqy kúninde is-sharaǵa shamamen 10 myń fermer qatysty.
Aıta keteıik, Batys Qazaqstanda dıqandar egin orýǵa kiristi.