Aqmola oblysynda Halyq qaharmany Raqymjan Qoshqarbaevtyń erligine taǵzym etildi
ASTANA. KAZINFORM — Taıtóbe aýylynda aty ańyzǵa aınalǵan batyr Halyq qaharmany Raqymjan Qoshqarbaevtyń erligin ulyqtaýǵa arnalǵan saltanatty gúl shoqtaryn qoıý rásimi ótti, dep habarlaıdy QR Qorǵanys mınıstrliginiń baspasóz qyzmeti.
1945 jyldyń dál osy 30 sáýiri kúni Raqymjan Qoshqarbaev surapyl shabýyl kezinde Reıhstag ǵımaratyna alǵashqylardyń biri bolyp Jeńis týyn tikken bolatyn.
Osyndaı mańyzdy is-sharaǵa QR Qorǵanys mınıstrligi men Qosshy qalalyq ishki saıasat bóliminiń ókilderi, eńbek jáne soǵys ardagerleri men mektep oqýshylary qatysty. Al, 102 jastaǵy Uly Otan soǵysynyń ardageri Nurqasym Ájitaevtyń kelýi urpaqtar sabaqtastyǵy men Otan qorǵaýshylardyń erligine degen sheksiz qurmettiń aıqyn kórinisi boldy.
— Abyroı men mindetti, paryz ben áskerı antty, sondaı-aq ádildikti mansap pen ataqtan bıik qoıǵan tulǵalarmen bir sapta turý biz úshin úlken mártebe. Ónegeli ómir joly men maıdandaǵy erligi jastarǵa úlgi bolǵan jerlesimiz Raqymjan Qoshqarbaevtyń batyrlyǵyna basymyzdy ıemiz, — dedi Tárbıe jáne ıdeologııalyq jumys departamentiniń ardagerlermen jumys basqarmasynyń bastyǵy polkovnık Qaırat Ydyryshev.
Jınǵa qatysýshylar batyrdyń esimin bir mınýttyq únsizdikpen eske aldy. Kópti kórgen aqsaqaldar jas býynǵa aq batasyn berip, ósıet aıtsa, mektep oqýshylary soǵys taqyryby men patrıottyq rýhtaǵy jyr shýmaqtaryn oqyp berdi. Elordadaǵy Raqymjan Qoshqarbaev eskertkishinen bastalyp, Taıtóbe aýylyna deıin jalǵasqan 30 shaqyrymdyq velosherý sharanyń mańyzyn arttyra tústi. Tórt ardager velo-shabandoz bul bastamalaryn dańqty batyrdyń eren erligine arnady.
Osydan eki jyl buryn ashylǵan bul eskertkish búginde áskerı-patrıottyq sharalardyń ortalyǵyna aınalǵanyn aıta ketken jón. Mundaı is-shara batyr baba erliginiń urpaqtar sabaqtastyǵy arqyly máńgi jasaı beretinin taǵy bir márte dáleldedi.
Osydan buryn Prezıdent Ákimshiliginiń Basshysy Aıbek Dádebaı Raqymjan Qoshqarbaev eskertkishine gúl shoǵyn qoıǵanyn jazdyq.
