Aqmola oblysynda ǵylymdy qoldaýǵa bólingen qarjy talan-tarajǵa túsken

ASTANA. KAZINFORM - Oblys prokýratýrasy ǵylymdy damytý jáne otandyq óndiristi qoldaý maqsatynda bólingen memlekettik granttyq qarajattyń tıimdi jumsalýyna tekserý júrgizdi, dep habarlaıdy QR Bas prokýratýrasynyń baspasóz qyzmeti.

Tekserý barysynda grant qarajatyn tıimsiz paıdalaný, jobalardyń qaıtalanýy, memlekettik múliktiń búlinýi, sondaı-aq málimdelgen bastamalardyń tolyq iske asyrylmaýy faktileri anyqtaldy.

Atap aıtqanda, bir jaýapkershiligi shekteýli seriktestiktiń qyzmetinde 295 mln teńge kólemindegi granttyq qarajattyń tıimsiz paıdalanylǵany belgili boldy. Atalǵan qarajat zaýyt salý jáne ónim óndirý maqsatynda bólingenimen, ol nysanaly maqsatyna saı jumsalmaǵan. Qazirgi ýaqytta bul qarajatty sot tártibimen memleketke qaıtarý boıynsha sharalar qabyldanyp jatyr.

Taǵy bir jaǵdaıda ǵylymı ortalyqtardyń biriniń laýazymdy tulǵalary ǵylymı zertteýler aıasynda óndirilgen 850 tonnadan astam tuqymdyq astyqty polıgonǵa shyǵaryp tastaǵan. Sonyń saldarynan memleketke 100 mln teńgeden astam zalal keltirilgen.

- Calǵyrtyq deregi boıynsha Qazaqstan Respýblıkasy Qylmystyq kodeksiniń 371-babynyń 2-bóligine sáıkes qylmystyq is tirkeldi. Tekserý nátıjesinde memlekettik qarjylandyrýdyń bólingenine qaramastan, bekitilgen josparlarǵa sáıkes iske asyrylmaǵan 13 ǵylymı joba anyqtaldy. Bul baǵyttaǵy jumystar áli júrip jatyr, - delingen Bas prokýratýranyń baspasóz qyzmeti taratqan aqparatta.

Osyǵan deıin Bas prokýratýra WhatsApp messendjerine qatysty jańa kıberqater týraly eskertti.