Aqmola oblysynda «Gazel» kóligi tórt jastaǵy qyzdy qaǵyp ketti
ASTANA. KAZINFORM- Aqmola oblysynda «Gazel» kóliginiń júrgizýshisi tórt jastaǵy qyzdy qaǵyp ketip, ol oqıǵa ornynda kóz jumdy. Júrgizýshi ustalyp, ýaqytsha ustaý ızolıatoryna qamaldy.
Aqmola oblysy Polıtsııa departamentiniń baspasóz qyzmetiniń málimetinshe, qaıǵyly oqıǵa 15 qyrkúıekte Tselınograd aýdanynyń Nuresil aýylynda bolǵan.
«Gazel» kóligin basqarǵan júrgizýshi kámeletke tolmaǵan balany qaǵyp ketken. Jol-kólik oqıǵasy saldarynan qyz mert boldy, - dep habarlady vedomstvo.
Polıtsııanyń málimetinshe, júrgizýshi ustalyp, ýaqytsha ustaý ızolıatoryna qamaldy. Osy fakti boıynsha tergeý júrgizilip jatyr.
Polıtsııa qyzmetkerleri júrgizýshilerdi jol qozǵalysy erejelerin jáne jyldamdyq rejımin qatań saqtaýǵa, jolda barynsha muqııat bolýǵa shaqyrdy.
Eske salaıyq, buǵan deıin Qostanaı oblysynda jaıaý júrginshiler qatysqan jol-kólik oqıǵalarynan 10 adam qaza tapqany habarlanǵan bolatyn.
Osyǵan deıin Aqtóbede úsh kólik soqtyǵysyp, júrgizýshi kóz jumǵany týraly jazdyq.
