Dárigerler Aqmola oblysynda gaz jarylysynan zardap shekkenderdiń jaǵdaıy týraly aıtty

KÓKShETAÝ. KAZINFORM — Aqmola oblysyndaǵy medıtsına qyzmetkerleriniń aıtýynsha, zardap shekkenderdiń alǵan jaraqatynyń negizgi sıpaty — ártúrli dárejedegi termııalyq kúıikter, olardyń kólemi men tereńdigi ártúrli, dep habarlaıdy Kazinform tilshisi.

Aqmola oblysynyń densaýlyq saqtaý basqarmasynyń málimetinshe, tótenshe oqıǵa saldarynan 26 adam zardap shekken. 7 adam qaza tapty, onyń 5-i oqıǵa ornynda, qalǵan ekeýi 26 aqpanda reanımatsııa bólimshesinde qaıtys bolǵan.

— Bastapqyda 15 adam gospıtalızatsııalandy. Qazirgi ýaqytta statsıonarda 13 naýqas emdelip jatyr. Alty adam qajetti medıtsınalyq kómek kórsetilgennen keıin ambýlatorlyq emge jiberildi, — dep habarlady basqarma ókilderi.

Oblystyq densaýlyq saqtaý basqarmasynyń derekterine sáıkes, zardap shekkenderdiń negizgi jaraqaty — ártúrli dárejedegi termııalyq kúıikter, olardyń kólemi men tereńdigi ártúrli. Patsıentterdiń jaǵdaıy únemi dárigerlerdiń baqylaýynda.

— Alty naýqas aýyr halde oblystyq aýrýhanaǵa jetkizildi, tórteýi Şýchınsk qalasyndaǵy reanımatsııa bóliminde jaǵdaıy aýyr, turaqsyz ári tasymaldaýǵa jaramsyz jaǵdaıda jatyr. Şýchınsk qalasynyń travmatologııa bóliminde úsh patsıent turaqty jaǵdaıda em alyp jatyr. Taǵy jeti patsıent jeńil, betkeı kúıikpen ambýlatorlyq baqylaýǵa alynǵan, — dep naqtylady Aqmola oblysynyń densaýlyq saqtaý basqarmasynyń basshysy Narıman Ermek.

Esterińizge sala keteıik, buǵan deıin Şýchınsk qalasyndaǵy kafede gaz jarylysy bolǵany jáne alty adam qaza tapqany habarlanǵan bolatyn. Keıin qaza tapqandardyń sany jeti adamǵa jetkeni aıtyldy. Sonymen qatar, Şýchınsk kafesindegi órtten zardap shekken alty adam Kókshetaý qalasyndaǵy aýrýhanaǵa jetkiziletindigi belgili boldy.