Aqmola oblysynda gaz datchıkteri 30 adamnyń ómirin saqtap qaldy
ASTANA. KAZINFORM — Aqmola oblysynda kómirtek totyǵy men tútindi anyqtaýǵa arnalǵan 12 myńǵa jýyq datchık ornatyldy, dep habarlaıdy Kazinform tilshisi.
Óńirde órt qaýipsizdigi aılyǵy jalǵasyp jatyr. Qutqarýshylar jergilikti atqarýshy organdardyń ókilderi jáne volonterlermen birge jeke sektorda profılaktıkalyq jumystar júrgizip, úılerdi jylytý maýsymyna daıyndaýǵa erekshe nazar aýdaryp otyr.
— Sońǵy bes jylda óńirde kómirtek totyǵy men tútindi anyqtaıtyn 12 myńǵa jýyq datchık ornatyldy. Olardyń der kezinde iske qosylýynyń arqasynda 30-ǵa jýyq adamnyń ómirin saqtap qalý múmkin boldy. Sonymen qatar mamandar tútin murjalary men jylytý peshterin tazalaý jumystaryn júrgizip jatyr. Jyl sońyna deıin osyndaı profılaktıkalyq jumystarmen áleýmettik osal toptarǵa jatatyn taǵy 9 myń otbasyny qamtý josparlanǵan, — dedi Aqmola oblysy TJD resmı ókili Ersaıyn Qoıshybaev.
Qutqarýshylardyń aıtýynsha, órttiń shyǵýyna kóbine adam salǵyrttyǵy sebep bolady. Olardyń qatarynda peshti paıdalaný erejelerin saqtamaý, elektr jabdyqtarynyń aqaýly bolýy jáne ot kózderin qaraýsyz qaldyrý bar.
Mamandar kez kelgen órttiń saldaryn joıýdan góri, onyń aldyn alǵan áldeqaıda tıimdi ekenin eske saldy.
Eske salaıyq, buǵan deıin Qyzylordada 500-ge jýyq úıge tegin datchık ornatylǵanyn jazǵan bolatynbyz.
