Aqmola oblysynda er adam traktordyń astyna túsip, qaza tapty

ASTANA. KAZINFORM — Polıtseıler jolaýshylardy arnaıy qarastyrylmaǵan oryndarda tasymaldaýǵa bolmaıtynyn taǵy bir márte eskertti, dep habarlaıdy Kazinform tilshisi.

Aqmola oblysy polıtsııa departamenti baspasóz qyzmetiniń málimetinshe, qaıǵyly jol-kólik oqıǵasy 6 maýsym kúni saǵat 13:30 shamasynda Derjavınsk qalasynan eki shaqyrym qashyqtyqtaǵy dalaly jerdegi jolda Lunking markaly dońǵalaqty tıegish traktordyń qatysýymen bolǵan.

— Aldyn ala málimet boıynsha, kólik kabınasynda bir ǵana oryn qarastyrylǵanyna qaramastan, jolaýshy fıltr kassetalarynyń ústine otyrǵan. Qozǵalys kezinde ol tepe-teńdigin saqtaı almaı, jolǵa qulap, traktordyń artqy dóńgeleginiń astyna qalǵan. Er adam oqıǵa ornynda alǵan jaraqatynan kóz jumdy, — dep habarlady vedomstvodan.

Polıtseılerdiń málimetinshe, traktor júrgizýshisi oqıǵa kezinde mas bolmaǵan. Atalǵan fakti boıynsha QR QK 345-baby 3-bóligi boıynsha (Kólik quraldaryn júrgizýshi adamdardyń jol júrisi nemese kólik quraldaryn paıdalaný qaǵıdalaryn buzýy, abaısyzda adam ólimine ákep soqqan áreket) sotqa deıingi tergeý bastaldy.

— Traktor arnaıy turaqqa qoıyldy, tergeý amaldary júrgizilip jatyr, — dep tolyqtyrdy vedomstvo.

Quqyq qorǵaý organdary jumys berýshiler men arnaıy tehnıka ıelerine qaýipsizdik tehnıkasy boıynsha nusqaýlyqtardy turaqty túrde ótkizip, tehnıkany paıdalaný erejeleriniń saqtalýyn baqylaý qajettigin eske saldy.

Osyǵan deıin sáýir aıynda Esil-Arqalyq ótkelinde poıyzben soqtyǵysqan traktorshy qaza bolǵanyn jazǵanbyz.