Aqmola oblysynda er adam 8-qabattan sekirmek bolǵan
ASTANA. KAZINFORM – Aqmola oblysynda polıtsııa qyzmetkerleri kópqabatty úıdiń 8-qabatynan sekirmek bolǵan er adamdy qutqaryp qaldy, dep habarlaıdy Polisia.kz.
Oqıǵa 10 shilde kúni saǵat 13:25 shamasynda Stepnogorsk qalasynda bolǵan. Polıtsııaǵa shaǵyn aýdandardyń birindegi kópqabatty úıdiń segizinshi qabatyndaǵy balkonnan er adamnyń sekirýge nıetti ekeni týraly habar túsken.
Úsh mınýt ishinde oqıǵa ornyna patrýldik polıtsııa vzvodynyń qyzmetkerleri Damır Nurtasov pen Arman Blıalov jetken.
Polıtseıler segizinshi qabatqa kóterilgen kezde balkon syrtynda turǵan er adamdy baıqap, onymen birden baılanys ornatýǵa tyrysqan. Olar sabyrly sóılesip, azamattyń nazaryn aýdaryp, senimge kirýge áreket etti.
– Áńgime barysynda er adamnyń mundaı qadamǵa barýyna jubaıymen bolǵan janjal sebep bolǵany anyqtaldy. Bir polıtseı sóılesýdi jalǵastyryp jatqan kezde, ekinshi qyzmetker qaýipsizdik sharalaryn saqtaı otyryp, er adamdy balkonnyń ishki jaǵyna qaraı tartyp aldy, – dep habarlady polıtsııadan.
Tártip saqshylarynyń jedel ári úılesimdi áreketiniń arqasynda qaıǵyly jaǵdaıdyń aldyn alý múmkin boldy. Qutqarylǵan azamat medıtsınalyq qyzmetkerlerge tapsyrylyp, qajetti kómek kórsetý úshin medıtsınalyq mekemege jetkizildi.
– Adam ómirin saqtaý – polıtsııa qyzmetkerleriniń basty mindetteriniń biri. Osyndaı qıyn sátte jedel sheshim qabyldap, durys áreket etý arqyly polıtseıler taǵy bir azamattyń ómirin saqtap qaldy, – dep atap ótti vedomstvodan.
Aıta keteıik, Taldyqorǵanda polıtseıler sýıtsıdtiń aldyn aldy.
