Aqmola oblysynda 90-nan astam adamdy kene shaqqan
ASTANA. KAZINFORM – Aqmola oblysynda kene shaǵý derekteri kúrt kóbeıip, epıdemıologııalyq maýsym bastalǵaly beri 93 adam zardap shekti, dep habarlaıdy Kazinform agenttiginiń tilshisi.
2026 jyly óńirde kene entsefalıti boıynsha epıdemıologııalyq maýsym ádettegiden erte bastaldy. Buǵan kóktemniń erte kelýi men qar jamylǵysynyń tez erýi sebep bolǵan. Sonyń saldarynan kenelerdiń belsendiligi artyp, medıtsınalyq kómekke júginýshiler sany kóbeıgen.
Aqmola oblysynyń bas memlekettik sanıtarııalyq dárigeri Serik Omarhanovtyń aıtýynsha, ótken jyldyń osy kezeńimen salystyrǵanda kene shaǵý faktileri 2,1 ese ósken. Byltyr osy ýaqytta 43 jaǵdaı tirkelse, bıyl 93 adam zardap shekken. Onyń ishinde 14 jasqa deıingi balalar – 29 jaǵdaı nemese 31,1 paıyz.
Barlyq zardap shekkender der kezinde medıtsınalyq kómekke júgingen. 75 adamǵa ımmýnoglobýlınmen profılaktıkalyq em júrgizildi. Al 18 adam bul kómekti almaǵan. Onyń bireýi úsh táýlikten kesh júginse, bireýine medıtsınalyq qarsy kórsetilim bolǵan, taǵy biri emnen bas tartqan. Qalǵan 15 jaǵdaıda kene shaǵý endemııalyq emes aýmaqtarda tirkelgen.
– Óńirler boıynsha eń kóp kene shaǵý deregi Kókshetaýda tirkeldi – 43 jaǵdaı. Býrabaı aýdanynda – 25, Zerendi aýdanynda – 8, Atbasar aýdanynda jáne Stepnogorsk qalasynda – 5 jaǵdaıdan. Jarqaıyń jáne Tselınograd aýdandarynda – 2 jaǵdaıdan, Sandyqtaý, Ereımentaý jáne Egindikól aýdandarynda bir-bir jaǵdaıdan tirkeldi, – deıdi Serik Omarhanov.
Aqmola oblysynda kene entsefalıti boıynsha endemııalyq aımaq retinde Sandyqtaý aýdany qalyp otyr. Munda jyl saıyn kóktem jáne kúz mezgilderinde kenege qarsy eki kezeńdik óńdeý jumystary júrgiziledi. Bıylǵy alǵashqy dezınsektsııalyq sharalar sáýir aıynyń sońy men mamyr aıynyń basyna josparlanǵan.
Sondaı-aq Sandyqtaý aýdanynda kene entsefalıtine qarsy ekpe endemııalyq aýmaqtarda jumys isteıtin azamattarǵa salynady. Olardyń qatarynda orman sharýashylyǵy qyzmetkerleri, shopandar, mehanızatorlar jáne tabıǵı oshaqtarǵa jıi baratyn ózge de mamandar bar. Mamandardyń aıtýynsha, vaktsına jetkilikti mólsherde bar.
Sanıtarııalyq dárigerler kóktem-jaz mezgilinde tabıǵat aıasyna shyqqanda qorǵanysh kıimin kıip, repellentter qoldanyp, serýennen keıin deneni muqııat tekserý qajet ekenin eskertedi. Kene shaqqan jaǵdaıda alǵashqy 72 saǵat ishinde dárigerge jedel qaralý óte mańyzdy.
Eske sala ketsek, Shyǵys Qazaqstanda 100-ge jýyq adamdy kene shaqty.
Al Soltústik Qazaqstan oblysynda da kún jylynǵaly kene shaqqan júzge jýyq adam dárigerge qaraldy.
