Aqmola oblysynda demalys kúnderi sý aıdyndarynda 5 adam qaza tapty
ASTANA. KAZINFORM — Aqmola oblysynyń qutqarýshylary dabyl qaǵyp otyr. Ótken demalys kúnderi óńirdiń sý aıdyndarynda adam ólimine ákelgen 5 oqıǵa tirkeldi.
Onyń biri — sýǵa batý faktisi, qalǵan tórteýi — jazataıym oqıǵalar. Ókinishke qaraı, qaza tapqandardyń úsheýi — balalar.
Qaıǵyly oqıǵalar Kókshetaý qalasynda, sondaı-aq Arshaly, Tselınograd jáne Astrahan aýdandaryndaǵy shomylýǵa tyıym salynǵan oryndarda boldy.
Shomylý maýsymy bastalǵaly beri oblys boıynsha sý aıdyndarynda 15 adam kóz jumdy. Qaıǵyly jaǵdaılardyń negizgi sebepteri — mas kúıinde sýǵa túsý jáne óz múmkindigin durys baǵalamaý.
— Aqmola oblysy TJD turǵyndardy sýdaǵy qaýipsizdik erejelerin qatań saqtaýǵa, balalardy qaraýsyz qaldyrmaýǵa jáne tek ruqsat etilgen jaǵajaılarda ǵana shomylýǵa shaqyrady, — delingen habarlamada.
Aıta ketelik Shyǵys Qazaqstanda shomylý maýsymy bastalǵaly úsh adam sýǵa batyp ketti.
