Aqmola oblysynda dárigerler áli kúnge kommýnaldyq shyǵyndarǵa ótemaqy ala almaı otyr

ASTANA. KAZINFORM — Aqmola oblysynda aýyldyq eldi mekenderde turyp, jumys isteıtin medıtsına qyzmetkerlerine kommýnaldyq qyzmetter men otyn satyp alýǵa beriletin ótemaqy máselesi sheshilmeı keledi. Áleýmettik qamsyzdandyrý, mádenıet, sport jáne veterınarııa salasynyń mamandary da osyndaı jaǵdaıda.

Zań boıynsha aýyldyq jerdegi medıtsına qyzmetkerlerine jylyna bir ret 15 AEK kóleminde (shamamen 60 myń teńge) áleýmettik qoldaý tólemi qarastyrylǵan. Sol sııaqty ótemaqy atalǵan salalardyń basqa da qyzmetkerlerine berilýi tıis. Alaıda Aqmola oblysynda bul másele birneshe jyldan beri depýtattardyń kóterýine qaramastan, sheshimin tappaı keledi.

Oblystyq máslıhattyń ekonomıka jáne bıýdjet máseleleri jónindegi turaqty komıssııasynyń tóraǵasy Marat Qoıshybaevtyń aıtýynsha, bul — áleýmettik turǵydan asa mańyzdy másele. Buǵan deıin mundaı qoldaý muǵalimderge berilip, búginde 12 myńǵa jýyq aýyl muǵalimi jylytý maýsymyna tólem alǵan.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Sholpan Rahmatýllınanyń málimetinshe, ótemaqyny barlyq sanattaǵy qyzmetkerlerge tóleý úshin oblystyq bıýdjetten 195 mln teńge qajet.

- Qazir qarjy esebi 3 119 mamanǵa daıyndalǵan. Biraq keıbir aýdandar erejege ózgeris engizbegendikten, másele kesheýildep otyr, — dedi ol.

«SENIM» salalyq kásipodaǵynyń tóraǵasy Serik Kakenov te máseleni kóterip, aýyl dárigerlerine ótemaqy tóleý oblystyq bıýdjet esebinen júzege asady dep maquldanǵanyn jetkizdi.

- Bul másele oblys ákimi tarapynan da aıtylǵan. Bar bolǵany adam basyna - 59 myń teńge, 2 200 dárigerge qajet. Bul — aýyl úshin úlken kómek, — dedi ol.

Akmola oblystyq kásipodaqtar ortalyǵynyń ókili Bolat Jýpınov bolsa, jaǵdaıdyń aýyldyq medıtsına kadrlaryn ustap qalýǵa tikeleı áser etetinin aıtty.

- Biz eki jylda 38 densaýlyq saqtaý nysanyn salamyz dep otyrmyz. Biraq onda kim jumys isteıdi? Qyzmetkerlerdi qoldamaı, aýyldyq medıtsınany saqtap qala almaımyz. Bul — aýyldaǵy adam kapıtalyn damytý problemasy, — dedi ol.

Oblystyq ekonomıka jáne bıýdjettik josparlaý basqarmasy basshysynyń orynbasary Azamat Іbikenovtiń aıtýynsha, bıýdjette únemdelgen qarajat bar, biraq ázirge onyń qaıda jumsalatyny belgisiz. 

- 195 mln teńgeni bólý joldaryn qarastyryp jatyrmyz. Únemdelgen aqsha aıasynda qaıta bólinýi múmkin, — dedi Іbikenov.

Aıta keteıik, Aqmola oblysynda naýqastyń 1,5 mln teńgesin aldap alǵan dáriger sottaldy.