Aqmola oblysynda daladan tabylǵan balanyń jaǵdaıy belgili boldy
ASTANA. KAZINFORM – Aqmola oblysynda dalada jaraqat alǵan kúıde tabylǵan bes jasar bala qazir Kókshetaýdaǵy oblystyq kópbeıindi balalar aýrýhanasynda em qabyldap jatyr. Dárigerler onyń jaǵdaıyn turaqty dep baǵalap otyr.
Aqmola oblystyq densaýlyq saqtaý basqarmasynyń baspasóz hatshysy Madına Smaǵulovanyń aıtýynsha, bala Astrahan aýdandyq aýrýhanasyna denesinde jaraqat izderi bar, ashyqqan, qaraýsyz qalǵan kúıde jetkizilgen.
– Dárigerler balanyń jaǵdaıyn turaqtandyryp, qajetti tekserýlerdi taǵaıyndady. Keshe ol tolyq tekserýden ótý jáne beıindi mamandardyń keńesin alý úshin Kókshetaýdaǵy oblystyq kópbeıindi balalar aýrýhanasyna aýystyryldy. Qazirgi jaǵdaıy turaqty, ómirine tikeleı qaýip joq, – dedi ol.
Onyń aıtýynsha, balanyń tábeti jaqsy, ózi kópshil.
– Qaýipsizdigin qamtamasyz etý úshin palata mańynda polıtsııa qyzmetkerleri kezekshilik etip júr. Qazir bul iske qorǵanshylyq organdary men polıtsııa aralasyp jatyr, – dedi baspasóz hatshysy.
Aıta keteıik, buǵan deıin Atyraýda 83 jasóspirimniń ata-anasy ákimshilik jaýapkershilikke tartyldy.
