Aqmola oblysynda dalada adasyp qalǵan aýyl turǵyndary bir kúnnen keıin tabyldy

KÓKShETAÝ. KAZINFORM - Aqmola oblysynda dalada adasyp qalǵan aýyl turǵyndary bir táýlik ótkennen keıin tabyldy.

Aqmola oblysy PD baspasóz qyzmetiniń málimetinshe, aýyl turǵyndarynyń joǵalǵany týraly Stepnogor qalalyq PB jaqyn mańdaǵy aýyldardyń biriniń turǵyny habarlap aıtqan. Onyń sózinshe, 6 shildede tańǵy saǵat 10:30 shamasynda «Aýdı» kóligine mingen 5 adam (týystary) Qaraoqty aýyly baǵytynda ornalasqan zıratqa ketip, qaıtyp oralmaǵan. Bir kún baılanysqa shyqpaǵan týystary úshin alańdaǵan ol polıtsııaǵa júginip, kómek suraǵan.

Osyǵan baılanysty Stepnogor qalalyq PB Bestóbe kentiniń polıtsııa bóliminiń bastyǵy Nurbek Sultanǵazıev, kezekshi bólimniń ınspektory Baqytbek Kárimov jáne ıývenaldy polıtsııa tobynyń ınspektory Ásemgúl Ábenova dereý joǵalǵan adamdardy izdeýge kiristi.

«Joǵalǵan adamdardyń arasynda zeınetker boldy. Biz onyń densaýlyǵy úshin alańdadyq», – dedi podpolkovnık Nurbek Sultanǵazıev.

Іzdeý barysynda tártip saqshylary Stepnogor qalasynan 30 km jerden kólik júrgizýshisin tapty. Onyń sózinshe, kóligi sazǵa batyp qalǵan, artynsha isten shyqqan. Sodan soń ol kómek shaqyrý úshin qalaǵa jaıaý shyǵyp, adasyp ketken. Arada biraz ýaqyt ótkende tártip saqshylary Izobılnoe aýylynan 30 km jerden ózge adamdardy da tapty, olardyń barlyǵy aman.

Aıta ketsek, budan buryn Aqmola oblysynda 44 jastaǵy áıel izdestirilip jatqandyǵyn jazǵan edik.