Aqmola oblysynda buryn kisi óltirgen adam qamqorshy retinde taǵaıyndalǵan

ASTANA. KAZINFORM - Aqmola oblysy prokýratýrasynyń taldaý nátıjesi boıynsha ýákiletti organdardyń tarapynan adam óltirý jáne ózge de qylmystar úshin sottalǵan tulǵalardy qamqorshy retinde taǵaıyndaý derekteri anyqtaldy, dep habarlaıdy oblystyq prokýratýranyń baspasóz qyzmeti.

Qoldanystaǵy zańnamaǵa sáıkes, qamqorshylar men qorǵanshylar bolyp psıhıkalyq aýrýlary bar nemese sottalǵan adamdar taǵaıyndalmaýǵa tıis.

Máselen, eki birdeı áreketke qabiletsiz tulǵaǵa buryn kisi óltirgeni úshin sottalǵan adam qamqorshy bolǵan.

Budan basqa, áreketke qabiletsiz azamatqa qamqorshy retinde «shızofrenııa» dıagnozy qoıylǵan azamat taǵaıyndalǵan.

Sondaı-aq, ýákiletti organdarmen áreketke qabiletsiz azamattardy esepten shyǵarý jóninde sharalar qabyldanbaǵan.

Nátıjesinde, oblystyń 28 qaıtys bolǵan tulǵasy áli de «áreketke qabiletsiz» sanatyndaǵy esepte turǵan tulǵalar qatarynda kórsetilgen.

Prokýrorlyq qadaǵalaý sharalary nátıjesinde buryn sottalǵan qamqorshylar jáne psıhıkalyq aýytqýy bar tulǵalar óz mindetterinen shektetildi, derekter zańnamaǵa sáıkestendirildi, jaýapty tulǵalar tártiptik jaýapkershilikke tartyldy.

Oblys prokýratýrasy osal toptaǵy azamattardyń quqyqtaryn qorǵaý boıynsha jumystardy jalǵastyrýda.

Osyǵan deıin prokýratýranyń balalar ortalyǵy tárbıelenýshisine 1,1 mln teńge alıment óndirip bergeni týraly jazdyq.