Aqmola oblysynda bulan mıgratsııasyna baılanysty júrgizýshilerge jolda abaı bolý kerektigi eskertildi
ASTANA. KAZINFORM — Aqmola oblysynda joldarda jabaıy janýarlardyń kóbeıýine baılanysty kólik júrgizýshilerine saq bolý jóninde eskertý jasaldy. Jyl basynan beri óńirdiń qalaaralyq trassalarynda janýarlarmen baılanysty 8 jol-kólik oqıǵasy tirkelgen.
Polıtsııa departamentiniń málimetinshe, jabaıy ańdardyń maýsymdyq kóshý kezeńinde ásirese bulan jáne basqa da janýarlardyń jolǵa shyǵý qaýpi artady. Osyǵan baılanysty quqyq qorǵaý organdary júrgizýshilerdi, ásirese keshki jáne túngi ýaqytta, barynsha muqııat bolýǵa shaqyryp otyr.
Máselen, «Astana–Şýche» tasjolynda bolǵan kezekti JKO kezinde 52 jastaǵy Hyundai Tucson júrgizýshisi 95-shaqyrymda jolǵa kenetten shyqqan bulanǵa soǵylǵan. Oqıǵa saldarynan avtokóliktegi eki jolaýshy medıtsınalyq kómekke jetkizilgen.
Jyl basynan beri tirkelgen 8 oqıǵanyń basym bóligi ormandy alqaptar arqyly ótetin tasjoldarda oryn alǵan. Polıtsııa mundaı aýmaqtarda janýarlardyń mıgratsııa joldary ótetinin eske saldy.
Vedomstvo júrgizýshilerge «Jabaıy janýarlar» belgisi qoıylǵan ýchaskelerde jyldamdyqty tómendetýdi, ymyrt pen túngi ýaqytta asa saq bolýdy, qaýipsiz araqashyqtyqty saqtaýdy jáne jolda alańdamaýdy eskertti.
Buǵan deıin Jońǵar Alataýynda qońyr aıýǵa qatysty kútpegen jaǵdaı bolǵanyn jazǵan edik.
