Aqmola oblysynda birneshe aýyl taratylady

ASTANA. KAZINFORM – «Ashyq NQA» portalynda Aqmola oblysynyń ákimshilik-aýmaqtyq qurylymyna ózgerister engizý boıynsha birqatar usynys jarııalandy.

Aqmola oblysy ákimdiginiń qaýlysy men oblystyq máslıhattyń «Aqmola oblysynyń ákimshilik-aýmaqtyq qurylymyn ózgertý týraly» birlesken sheshimine sáıkes, birneshe aýyldy basqa eldi mekender sanatyna jatqyzyp, eseptik derekterden shyǵarý kózdelgen. Taratylatyn aýyldar:

- Aqbeıit (Astrahan aýdany);

- Jolbasshy (Ereımentaý aýdany);

- Úlgialǵan, Qaraǵaı, Jańatýǵan, Fedoseevka, Yntaly (Býrabaı aýdany);

- Erýslanovka, Ultýǵan, Dobrovolnoe, Krasnoselskoe, Balýan Sholaq, Pýshkın (Bulandy aýdany);

- Chashke (Sandyqtaý aýdany).

Odan bólek óńirdiń keıbir aýdanynda ákimshilik-aýmaqtyq ózgerister josparlanyp otyr. Atap aıtqanda, Tselınograd aýdanynyń Qyzylsýat aýyldyq okrýgi sheginde jańa aýyl qurylyp, oǵan «Nurly» ataýy beriledi. Egindikól aýdanynyń Spırıdonovka jáne Abaı aýyldaryn biriktirip, Spırıdonovskıı aýyldyq okrýgi qurylyp, onyń ortalyǵy Spırıdonovka aýyly bolady.

Bulandy aýdanynyń Aınakól aýyldyq okrýgi taratylyp, Aınakól jáne Ostrogorka aýyldary Jýravlev aýyldyq okrýginiń ákimshilik-aýmaqtyq qaramaǵyna beriledi. Sondaı-aq, Birjan sal aýdanynyń Valıhanov aýyldyq okrýgine qarasty Aqsý aýyly taratylyp, Valıhanovo aýylyna qosylady. Aqkól aýdanynyń Jalǵyzqaraǵaı aýyldyq okrýgine qarasty Qaınar aýyly da taratylyp, Jalǵyzqaraǵaı aýylyna biriktiriledi. Aqkól qalasyna qarasty Ernazar aýylynyń ákimshilik baǵynystylyǵy ózgertilip, Ýrıýpın aýyldyq okrýgine beriledi.

Arshaly aýdanyndaǵy Jibek joly aýylyna kent mártebesi berilip, Jibek joly aýyldyq okrýginiń quramynan shyǵarylyp, okrýg ortalyǵy Jaltyrkól aýyly bolyp belgilenedi.

Qujat jobasy bıyl 17 sáýirge deıin qoǵamdyq talqylaýǵa usynylyp otyr, al 2025 jylǵy maýsymda iske asyrý josparlanǵan.

Aıta ketsek, jyl basynda Kentaý qalasynyń aýmaǵy ulǵaıatyny týraly habarlaǵan edik.